عمرو أديب: حديث الرئيس بشأن صندوق النقد من أقوى التصريحات بشأن الاتفاق

أكد الإعلامي عمرو أديب، أن تصريحات الرئيس عبد الفتاح السيسي اليوم بشأن اتفاق مصر مع صندوق النقد الدولي أحدثت ردود أفعال داخل وخارج البلاد.

وقال أديب خلال برنامج "الحكاية" المذاع على قناة "إم بي سي مصر": "النهاردة في مصر اتقال واحد من أهم وأقوى التصريحات اللي ليها علاقة باتفاقنا مع صندوق النقد أنا لا أبالغ الكلام اللي قاله الرئيس عبد الفتاح السيسي عن اتفاق مصر مع صندوق النقد أظن أن كان له ردود أفعال في الداخل والخارج ولم نسمع كلام بهذه القوة وهذا الاهتمام بموضوع الاتفاق مع الصندوق". 

وأضاف: "الموضوع بتاع الصندوق ده بيصب في المصلحة على طول وأنا شغال على موضوع الصندوق ده من أول ما ابتدينا نعمل معاه اتفاقات والنهاردة الرئيس تحدث بشكل قوي عن هذا الأمر".

وتابع: "لابد من مراجعة الأمر مع الصندوق والرئيس بيقول ايه لو هذا الأمر يشكل ضغطا على الناس وهو يشكل ضغطا على الناس الرئيس عارف أن هذا الأمر يشكل ضغطا على الناس وأن الرئيس قال بشكل واضح الجملة اللي قبليها إن هذه الأزمة في المنطقة قدامها سنة كمان".

وأوضح: "ازاي هنقدر نشتغل في ظل اتفاق الصندوق والمسالة ليست سهلة أن أنت تقول للصندوق احنا مش مرتاحين لهذا الاتفاق لأن الرئيس شايف أن تنفيذ الاتفاق بحذافيره وتوقيتاته مسألة ليست مريحة للشعب المصري".

وذكر: "الصندوق احنا اتفقنا معاه وقدمناله برنامج ولكن زي ما الرئيس قال احنا خسرانين 7-8 مليار دولار في الشهور اللي فاتت أه احنا اتفقنا ولكن بعد ما عملنا الاتفاق الظروف الموجودة صعبة جدا".

وواصل: "أنت لما بتتفق مع الصندوق الصندوق بيمشي معاك الإدارة بالاهداف يعني أنت عملت ده ماشي معملتش ده أنا مش جاي الشهر الجاي يعني أنا مش مكمل أنت يا تنفذ الأشياء اللي اتفقنا عليها يا انا مش مكمل ومش هعملك الحاجات اللي اتفقنا عليها ومنها أقساط القرض".

واختتم: "هو اتفاق واضح وأنا عايزكم بس تدخلوا في الضورة أن مصر الان في ممارسة لتغيير أمر صعب جدا لأن هو الصندوق ملوش دعوة واحنا اتفقنا على 1-2-3 نعمل ده ولكن أن يأتي رئيس الدولة ويقول أنا شايف أن هذا الاتفاق ضغط على الناس وهو ضغط على الناس فعلا الرئيس عارف وشايف وهو بيقول الرسالة واضحة لا احنا لازم نشوف طريقة".