أحمد موسى: صندوق النقد يتسبب في أزمات للدولة وأتمنى إنهاء التعاون معه

هاجم الإعلامي أحمد موسى، صندوق النقد الدولي، مشيرا إلى أنه لا يدخل إلى دولة إلا وتسبب في أحداث أزمة داخلها.

وقال موسى خلال برنامج "على مسؤوليتي" المذاع على قناة "صدى البلد": "سيادة الرئيس قعد يشرح الوضع وقال خسرنا 7 مليارات جنيه في 10 شهور ويمكن الموضوع ده يستمر لمدة سنة كمان طيب الدولة مش عايزة ضغط على الرأي العام ومش عايزين ضغط على الناس ليه؟ وقال البرنامج الحالي جاي في ظروف إقليمية ودولية ومشاكل ضخمة".

وأضاف: "لازم الصندوق والبنك يبقوا عارفين البرنامج المردي غير برنامج 2016 البرنامج في 2016 خلصناه عشان كان في استقرار، والنهاردة في فوضى في المنطقة وحروب مأثرة علينا واحنا أكتر دولة تتعرض لخسائر ومشاكل كبيرة جدا".

وتابع: "لما سيادة الرئيس يرى هذا الأمر النهاردة وكان صريحا وصوت الشعب وصل عند سيادة الرئيس وهذا الرجل النهادرة بيقول للناس أنا عارف أن انتوا تعبانين، وعشان كده بقول للحكومة راجعوا الموقف مع صندوق النقد الدولي يعني معناه أن ممكن نقول للصندوق كفاية مش عايزينه والله أتمنى نوقف التعامل مع الصندوق النهاردة قبل بكرة".

وواصل: "عندنا بنك التنمية وسيادة الرئيس هيسافر لقمة البريكس بعد بكرة البريكس معندهمش شروط واحنا أعضاء والدول عظيمة جدا ولا يتدخلوا في شؤونك ومبيعملوش عليك حصار لا اقتصادي ولا شروط وبالتالي خلاص جربنا الصندوق مكانش كويس دائما يقولوا على الصندوق ايه؟ صندوق النكد الدولي والصندوق لا يمكن يدخل دولة إلا ويعمل فيها أزمة بينكد على الناس دي تجربتنا تجربة 2016 انسوها التجربة الحالية من ساعة ما بدأنا البرنامج الجديد ده مشاكل كتيرة".

واختتم: "لو الرئيس شايف الموضوع ده مش مأثر مكانش أتكلم كده النهاردة، أنا بتكلم على الناس المحبين اللي هو الشعب اللي بيحب الرئيس وبيحب مصر".