أحمد بلال: لو الزمالك كسب السوبر المصري هتقدم لهم باعتذار رسمي

أكد أحمد بلال مهاجم الأهلي السابق، أن فريقه هو الأوفر حظا للفوز ببطولة السوبر المصرين مشيرا إلى الاستعداد الجيد الذي قام به الفريق خلال الفترة الماضية.

وقال بلال في مداخلة مع برنامج "خلاصة الكلام" المذاع على قناة "النهار": "كل حاجة في الكورة واردة ولكن أعتقد الأهلي قفل كويس على نفسه واستعد بشكل كويس، وأعتقد أن الزمالك بالغ كتير جدا في فرحة كأس السوبر وهما يبقالهم 3 أسابيع بيحتفلوا".

وأضاف: "الأهلي بيحتفل يوم واتنين ولكن بنقفل على نفسنا عشان في بطولات تانية جاية مينفعش تقف في حته وتقول أنا عملت كل حاجة كل القدم دايما شغالة على طول مينفعش النهاردة تكسب من 3 أسابيع تفضل تحتفل لحد ما تلعب السوبر المصري بعد كده".

وتابع: "الأهلي والزمالك أفضل ناديين في مصر وأكبر جماهيرية والجماهير بتاعتهم تؤهلهم بشكل كبير أنهم يكسبوا أي بطولة ودا الوضع الطبيعي وعشان تكسب أي بطولة لازم يبقي عندك جمهور بيحركك بشكل كبير جدا والأهلي يمتلك الكلام ده والزمالك يمتلك الكلام ده".

وأكمل: "النهاردة لما نتكلم على بيراميدز هي فرقة كبيرة ومحترمة وعندها قائمة كويسة ولكن معندهاش الجماهير اللي تحركها بدليل الأهلي لما لعب مع بيراميدز في مباراتين الدوري العام الأهلي كسب الماتشين ورا بعض ولو الأهلي لعب مع الزمالك في الوقت ده اعتقد الأمور كانت هتبقى مختلفة عشان جماهيرية الزمالك".

وأوضح: "أنا متوقع أن الأهلي ياخد بطولة السوبر المصري إن شاء الله لأن الأهلي من النوادر لما بيخسر بطولة بيدخل البطولة التانية بيبقي عنده حوافز كتيرة ودوافع قوية جدا وبيلعب فقط على المكسب والأهلي من وجهة نظري الشخصية البطولة اللي جاية بطولة السوبر تحديدا يعني أعتقد هيبقي مستعد بشكل كبير جدا بقالنا دلوقتي أسبوع مبنسمعش أي تصريحات لاي لاعيب من الأهلي ولا حتى مسؤولين كلها تصريحات انضباطية".

واختتم: "الأهلي الأسبوع اللي فات ده على أهبة الاستعداد لبطولة السوبر وطبيعي الزمالك يستعد ولكن بنتكلم مين دوافعه أكتر واللي يهمه المباراة أكتر والزمالك لو كسب هيكون استمرار لمكسب السوبر الافريقي ولكن الأهلي لو خسر هيبقي في مشكلة كبيرة جدا هتبقي خسران من المنافس ليك مرتين وداخل الدوري العام ولو الزمالك كسب هتقدم ليهم باعتذار رسمي".