عمرو أديب يرد على منتقدي مشروع رأس الحكمة: "فلوس وجت.. عملنا إيه وحش؟"

علق الإعلامي عمرو أديب، على انتقاد البعض لمشروع رأس الحكمة، والذي سيتم تنفيذه بشراكة مصرية – إماراتية في الساحل الشمالي الغربي.

وقال أديب خلال برنامج "الحكاية" المذاع على قناة "أم بي سي مصر": "ارجع معايا كده قولي كان في إيه؟ آه طبعا مصر قوية ونقدر نعدي الصعاب ولكن بالقوة علاقتك أرضك وتميزك رأس الحكمة دي ربنا اداهالك مميزة وفي حد قالك فلوس أهيه وضب نفسك وأنا جاي استثمر معاك".

وأضاف: "ديونك قلت وميزانيتك اتحسنت وفرص شغل 750 ألف فرصة عمل والشركات المصرية هتشتغل وتنبسط قولي إيه عايز ايه تاني؟ قولي إيه اللي حواليك كان يبقى أحسن في الأيام السودة دي".

وتابع: "نموذج جيد ونموذج نحب نشوفه بين الدول العربية كلها ونحس أننا كعرب نبقي واقفين جنب بعض كل واحد عنده حاجة يستغلها، الشيخ محمد بن زايد لما كان قاعد مع بايدن من أسبوعين في دول كانت بتروح أمريكا عشان تطلب سلاح".

وواصل: "يقولك المواقف السياسية أيه حكاية وقد تطابقت المواقف وكل واحد ليه رأي ولكن في الغالبية العظمى من القضايا إحنا متفقين، أرضك معاك صديقك معاك هل حد ممكن يقول إن دولة الإمارات لا تنطبق عليها اسم الدولة الصديقة؟".

وذكر: "أي شركة اشترتها الإمارات في مصر كانت وخداها بتعمل خساير قد إيه وتاني سنة عملت أرباح قد إيه، أنت بتشتغل مع علامة جودة إيه اللي يضايقني لما يبقى في مستثمر؟ هو المستثمر ده مش بيغامر بفلوسه؟ دا جايلك في وقت الدنيا ومعرفش العملة اللي داخل بيها بكام".

وأكمل: "وبعدين إيه مكانش وقتها نطور الصناعة أو نعمل طفرة في الزراعة إنت كنت عايز الفلوس بكرة، أنا أرحب جدا بالاستثمار من دولة الإمارات ومن المملكة العربية السعودية وقطر والكويت والجزائر طالما فيها حاجتين أنت بتديني السعر العادل ومفيش فيها حاجة تضر مصلحة بلدي".

وأوضح: "أنا مبسوط أن بلدي دخلها الفلوس دي وأنا مبسوط أن المستوى دا هيتعمل، هذا المشروع هيرفع المستوى جوة المكان هيرفع الأسعار".

واختتم: "إيه اللي وحش فيها أنت عملت إيه وحش؟ مصر عملت صفقة جيدة والإمارات عملت استثمار ناجح، نقطة إنت عايز إيه تاني؟".