شاهدة عيان من داخل أحد القطارين المتصادمين تروى تفاصيل الحادث

كشفت مريم عزت مراسلة قناة "صدى البلد" وإحدى ركاب قطاري حادث الزقازيق تفاصيل الحادث الذي وقع مساء اليوم.

وقالت عزت، في مداخلة مع برنامج "على مسؤوليتي" المذاع عبر فضائية "صدى البلد": "أنا كنت في القطار اللي جاي من المنصورة متجه إلى القاهرة، والقطر كان واقف في الزقازيق لأن كان في قطار متجه من الإسماعيلية للقاهرة والقطار اللي جاي من المنصورة كان واقف عشان التاني هيعدي بعده".

وأضافت: "بشكل مفاجئ سمعنا خبطة جامدة في القطار ونزلنا لقينا قطار تاني في نفس الخط اللي القطار موجود عليه ومش فاهمين دا جه إزاي واحنا لغاية دلوقت منعرفش إيه السبب وإيه اللي خلاه ييجي".

وتابعت: "القطار اللي حصل فيه التصادم كان جاي من القاهرة إلى الإسماعيلية وفجأة مرة واحدة حصل الخبطة ونزلنا لقينا جزء من عربية محطم ونتج عنه الإصابات وحالتي الوفاة".

وأوضحت: "القطار اللي خبط هو اللي كان جاي في الاتجاه الخطأ وكان جاي من القاهرة ورايح الإسماعيلية منذ وقوع الحادث تم الدفع بأعداد كبيرة من عربيات الإسعاف وكان مدير الأمن والمحافظ موجودين، والحماية المدنية كانت موجودة من اللحظة الأولى للحادث ومفيش حد مبيقومش بمهام الوظيفة بتاعته، القطارين كانوا مليانين ركاب وكان في أعداد كبيرة جدا".

وكشفت الهيئة القومية لسكك حديد مصر عن تفاصيل الحادث وقالت إن قطار ركاب رقم 281 ركاب المتجه من الزقازيق للإسماعيلية اصطدم بقطار ركاب رقم 336 المتجه من المنصورة إلى الزقازيق عند بلوك ٥ بمدينة الزقازيق.

وأعلنت وزارة الصحة وفاة 3 حالات وإصابة 47 آخرين في الحادث.