أحمد موسى يعلق على وفاة الباحثة ريم حامد (فيديو)
أكد الإعلامي أحمد موسى، أن وزارة الخارجية المصرية تتابع باهتمام حادثة وفاة الباحثة المصرية ريم حامد، والتي توفيت في العاصمة الفرنسية باريس.
وقال موسى خلال برنامج "على مسؤوليتي" المذاع على قناة "صدى البلد": "الباحثة المصرية ريم حامد، لقينا النهاردة الناس بتتكلم عن ريم حامد؛ ريم باحثة مصرية تدرس في جامعة باريس خريجة من جامعة القاهرة وراحت باريس عشان تعمل رسالة دكتوراه، فجأة أعلن عن العثور على ريم من غير ما حد يعرف التفاصيل".
وأضاف: "المعلومة اللي أنا عارفها، ريم كانت موجودة في زيارة لأسرتها ورجعت بيتها الخميس اللي فات وبعد عودتها إلى باريس حدثت الوفاة، إيه اللي حصل وإيه التفاصيل وإيه المعلومات، السفير علاء يوسف سفيرنا في باريس تواصل مع السلطات الفرنسية، القنصلية المصرية في فرنسا متواصلة مع السلطات الفرنسية لمتابعة الأمر".
وتابع: "ريم كانت موجودة في سكن داخلي في الجامعة، ريم متخرجة من قسم البايو تكنولوجي وكانت بتحضر دكتوراه في نفس المجال التخصصي الخاص بالجينات، واقعة ريم شغلت الناس والناس بتكلم في حاجات كتيرة وعلينا الانتظار، هناك تحقيقات تجريها السلطات الفرنسية، تعاون كامل مع السفارة المصرية واتصالات ومتابعة دقيقة جدًا، والخارجية المصرية النهاردة طلعت بيان أن هناك اهتمام كبير من الرأي العام بهذا الأمر".
وأوضح: "ننتظر التحقيقات، الجهات المعنية بتتابع، السفارة والقنصلية وهيطلع بيان واضح من السلطات الفرنسية يمكن اللي عمل تساؤلات اللي كانت بتكتبه ريم على صفحتها، بتكلم على تهديد وناس بيراقبوها وناس بيمشوا وراها، كانت بتكلم على حاجات بتخلي الناس تسأل ايه الحكاية؟ وكل ده ليس هناك معلومات عما جري محدش عنده لسة معلومة، السلطات الفرنسية مطلعتش أي بيان رسمي حتى الآن".
وذكر: "مش عايزين نجري في اتجاه ونجد اتجاه آخر تمامًا، ننتظر السفارة المصرية مع السلطات الفرنسية متابعين هذا الموضوع مع الأجهزة الأمنية في فرنسا، ومؤكد فرنسا هتطلع تفاصيل كاملة عن هذا الأمر، وهو أمر مهم وعامل رأي عام كبير جدًا".
