شاهد.. تامر أمين عن انسحاب الأهلي من الكأس: "ليه أخسر خسارة مجانية"

أكد الإعلامي تامر أمين أن قرار انسحاب الأهلي من المشاركة في بطولة كأس مصر ربما كان قرارا متسرعا مشيرا إلى أن النادي كان يجب أن يستكمل البطولة بالناشئين.

وقال أمين خلال برنامج "أخر النهار" المذاع على قناة "النهار": "الأهلي انسحب من الكاس ومباريات الكاس بتتلعب والأندية اللي كسبت في دور الـ 16 والتمانية ومكلمة؛ مكدبش عليكم أنا لحد النهاردة زعلان على القرار اللي مش عارف بقي منفعل والا متسرع اللي خده مجلس إدارة النادي الأهلي بالاعتذار عن المشاركة في بطولة كأس مصر لهذا الموسم رغم تأكدي وتفهمي واقتناعي وقبولي بالمبررات التي أدت إلى الرغبة في عدم المشاركة في بطولة الكأس".

وأضاف: "في أسباب فعلا متخلنيش أدخل بالقوام الأساسي للفريق الأول وأنافس عشان اخد البطولة دي عشان كده هخلص ومش هعرف أنافس بالفرقة دي في بطولات الموسم اللي جاي واللي هتبتدي بالسوبر الافريقي قدام الزمالك في السعودية ثم دوري أبطال أفريقيا وكأس العالم للأندية".

وتابع: "مليون في المية القرار صح أني مشاركش بس مشاركش بمين؟ هو ده الكلام وأنا بعيد الكلام دة تاني ليه؟ عشان المنهج بتاع التفكير لازم نبقي متفقين عليه؛ أنا ليه بخسر خسارة مجانية؟ ليه بسيب من غير ما اخد قدامها مقابل؟".

وأوضح: "خلاص كولر مع مجلس إدارة الأهلي اتفقوا أن بطولة الكأس خلاص متهمناش هذا الموسم اللاعيبة عملت اللي عليها وزيادة وعملت موسم تاريخي خلاص؛ كأس مصر ده هيوقع الرتم ويخلص اللياقة ويبوظ سياسة التدوير اللي عملها كولر وبالتالي لسنا في حاجة للقتال من أجل الحصول على هذا الكأس تمام متفقين وجمهور الأهلي مأمن على هذا الكلام قبل مجلس الإدارة مفيش مشكلة خالص".

وأكمل: "لكن في ما بين الأبيض والأسود 500 درجة مش لازم يا أشارك واخدها يا انسحب؛ في أني العب بالناشيئن أو الاحتياطتين بتوع الفريق الأول اللي مكانوش بيشاركوا وكان نفسهم يخدوا فرصة زي ما عمل سامي قمصان في التلات ماتشات الأهلي في الدوري".

واختتم: "كنا كسبنا المليون جنيه اللي هيندفع غرامة ورقم اتنين لا يحرم من المشاركة في بطولة كأس مصر الموسم القادم لأن الله أعلم الموسم الجاي هيبقي عامل ازاي لأن ممكن تتزنق وتبقي عايز تكسب كأس مصر".