مصطفى بكري يهاجم طبيب مستشفى عين شمس: "واحد كاره مهنته"

أكد الإعلامي مصطفى بكري، على واقعة اشتباك الفنان محمد فؤاد مع أحد الأطباء بمستشفى عين شمس خلال تواجد فؤاد بصحبه شقيقه المريض.

وقال بكري خلال برنامج "حقائق وأسرار" المذاع على قناة "صدى البلد": "امبارح اتكلمنا عن واقعة طبيب مستشفى عين شمس واذعنا فيديو للواقعة وكل التقدير والاحترام للأطباء والمبدعين ولكن في النهاية لا يصح إلا الصحيح وأنا واثق في موقف نقابة الأطباء بما فيها من قمم؛ مش كل دكتور صح ومش كل فنان صح ومش كل دكتور صح ومش كل مريض صح".

وأضاف: "محمد فؤاد راح في الأول سلم على الدكتور بكل حب والدكتور اداله ضهره وملتفتش وبعد كده بدأ الاشتباك مع الفنان وضربه برجله وقولنالكم وشوفنا صفحة الدكتور مصطفى أيمن والبوست كان صعب أوي لما واحد من 2023 بيقول الشهر ده المفروض بداية تالت سنة طبيب مقيم في قسم القلب منهم سنة قضيتها كجندي طبيب في كوبري القبة وفي الحقيقة لو هوجه نصيحة لأي حد أبعد عن الطب والشباب اللي داخلة امتحانات الثانوية بقولهم كبر دماغك وبلاش وجع قلب على الفاضي هتضيع سنين عمره في اللاشيء".

وتابع: "أنا بقول لنقيب الأطباء مجددا ترضي باهانة الطب بهذا الشكل؛ ترضي واحد يحرض أنه مفيش حد يرضي بقسم كذا ويسيب البلد تخرب بما فيها؛ الدكتور منفاش هذا البوست وبوستات كتيرة كان بيحرض فيها ويستهين بالناس".

وواصل: "أنا بسأل سؤال لنقيب الأطباء وأتمنى أن أجد إجابة؛ لابد أن تحقق عشان قيم الطب؛ دا واحد كان بيهين الطب وبيهين زملائه الأطباء وبيقولهم سيبوا البلد تخرب باللي فيها؛ يبقي دا أمر طبيعي أنه يحصل مع محمد فؤاد ويحصل مع أخرين؛ دا راجل كاره مهنته؛ له كل التقدير والاحترام بس ازاي ممكن ده يحصل؟".