أحمد موسى: داخلين ماتش المغرب مغلوبين.. والحكم رأف بينا (فيديو)
طالب الإعلامي أحمد موسى بمحاسبة المسؤولين عن النتائج السلبية التي حققتها بعثة مصر في دورة الألعاب الأوليمبية المقامة حاليا في فرنسا.
وقال موسى خلال برنامج "على مسؤوليتي" المذاع على قناة "صدى البلد": "لازم حساب أه محاسبة أه في تقصير أه وفي إنجازات أه؛ نتائج سلبية حصل كتير؛ منتخب اليد منتخب عالمي ياجماعة لأن هناك نظام وضع لليد منذ أيام الدكتور حسن مصطفى".
وأضاف: "منتخب اليد حد يقدر يتكلم عليه؟ لا ولكن ظروف حصلت لمنتخب اليد اللي هو أيضا الثواني الأخيرة تقدر تحافظ أو لا رغم أن 70% منهم محترفين واللي مش محترفين بيلعبوا اهلي وزمالك؛ منتخب اليد خامس العالم وكان بيلعب على الدهب وحقه يلعب على المركز الأول واتغلبوا من اسبانيا في الثواني الأخيرة واسبانيا اتغلبت من المانيا طبعا".
وتابع: "لازم نبقى شايفين منتخب اليد؛ اخفاق بسيط والنتيجة في الاخر سلبية خرجته من البطولة ورجع بقي ترتيبه الخامس؛ منتخب القدم ترتيبه الرابع ولكن كان ممكن يوصل للنهائي طبعا؛ منتخبنا الأوليمبي كان ممكن يوصل النهائي لان كنا قريبين من ماتش فرنسا".
وأكمل: "تاني بقول التركيز لان في هفوات وكل ده لازم يتشاف وازاي نحافظ على التفوق؛ الحساب هو بداية الإصلاح لو احنا عايزين اصلاح حقيقي لازم نحاسب ويبقي كل واحد عارف هيروح يمثل بلده وعارف أن الموضوع مش بسيط؛ بأبذل كل الجهد عشان بلدي".
وأوضح: "ماتش المغرب معملناش اللي علينا احنا داخلين الماتش رافعين الراية؛ جالنا كورة في الدقائق الأولى لو دخلناها كان الماتش اتقلب؛ ولكن داخل مغلوب داخل غالب نفسك ليه؟ ما تلعب لعبك وأنت لعبت قدام اسبانيا اللي غلبت المغرب ولعبت قدام فرنسا وكنا قريبين أوي ليه مرعوب وقلقان وليه خايف وبعدين هدف واتنين يدخل ست اهداف؟ الحكم رأف بينا دا موصلش الدقيقة 90 لانه خلاص وأنا بعد الجول الرابع بطلت وقلت والله ما هتفرج تاني".
واختتم: "في الاخر خلص الحكم ومحسبش ولا ثانية وقت إضافي وراف بينا هل ده معقول؟ منتخب مصر يبقي كده؟ وتاني بقول الاتحاد المصري لكرة القدم لازم يتكلم هو في دوري في العالم قاعد لحد دلوقتي؟ دا جزء من الكارثة اللي احنا فيها وما يتعرض له المنتخب اللاعبية دي بتلعب سنتين ورا بعض".
