مصطفى بكري: مصر تمر بظروف صعبة والدنيا "مولعة" حوالينا (فيديو)

أكد الإعلامي مصطفى بكري، أن مصر تمر بظروف صعبة، مشيرًا إلى أن المخاطر تزيد بشكل يومي والعالم ينتظر الحرب الإقليمية في المنطقة.

وقال “بكري” في خلال برنامج "على مسؤوليتي" المذاع على قناة "صدى البلد": "مصر الأيام دي بتمر بظروف صعبة مؤامرات من كل اتجاه والدنيا مولعة حوالينا وكمان المخاطر بتزيد كل يوم والكدابين بيزيدوا كل يوم".

وأضاف: "العالم كله مستني حدث مهم الكل بيتكلم عن الحرب الإقليمية اللي هتبقي حرب واسعة، الكل بيتكلم عن تدخلات اجنبية ممكن تحصل، شوفوا أمريكا بتحشد الأساطيل والطائرات في المتوسط والخليج كله أصبح منطقة عسكرية".

وتابع: "حلفاء إسرائيل كل دول استنفروا كأن إسرائيل هتكون نهايتها على إيد إيران، الكلام ده حذر منه الرئيس عبد الفتاح السيسي أكتر من مرة وبالذات في القمة العربية الإسلامية اللي انعقدت في الرياض في 11 نوفمبر من العام الماضي، كلام الرئيس واضح لما قال إن توسعة الحرب من شأنه أن يغير المعادلة في المنطقة كلها".

وواصل: "يا ترى العرب والأمم المتحدة والدول المعنية خدت الكلام ده مأخذ الجد؟ الرئيس برؤيته العسكرية الاستراتيجية كان يحذر من خطر دائم وكان كل يوم والتاني يدعوا للقاءات واتصالات ويقولهم يا جماعة لا تتركوا الأمور تمضى نحو الحرب الشاملة وما يحدث في غزة جريمة إنسانية وعسكرية وحرب إبادة تشن ضد الشعب الفلسطيني".

وأكمل: "الرئيس اتصل ونبه وحذر لكن محدش سمع؛ ماذا عن التوقعات؟ كل التصريحات اللي بنسمعها دلوقت بتقول إن هناك ضربة في مخاطر من حرب ممكن تندلع نتيجة هذه الضربة اللي ممكن توجهها ايران للإسرائيليين أو كما حذر حسن نصر الله الأمين العام لحزب الله من توجيه ضربه انتقاما لاغتيال السيد فؤاد شكر".

وأوضح: "حالة السكون اللي احنا فيها دلوقتي بتقول إن في تكتكيك الهدف منه استنفار إسرائيل ودا فيه إنهاك مادي وإنهاك اقتصادي وعسكري لإسرائيل والضربة ممكن تحصل فجأة وساعتها محدش يقدر يتوقع إلى أين يمكن أن تمضي الأمور".

واختتم: "إسرائيل هترد وأمريكا قد تجد نفسها طرف في الحرب والضرب ممكن يوصل للعراق واليمن وسوريا ولبنان وإذا تورطت أمريكا في الحرب بشكل كبير إيران هتضرب القواعد الأمريكية في الخليج وهناك تحدث الكارثة ويتحول الأمر لحرب شاملة ومدمرة".