شاهد.. أحمد موسى: نتائجنا وحشة في الأولمبياد والزعل هيكون على قدر الدعم

أكد الإعلامي أحمد موسى، أن نتائج البعثة المصرية في دورة الألعاب الأولمبية سيئة حتى الآن، مشيرا إلى أن النتائج لا تليق بمصر.

وقال موسى، خلال برنامج "على مسؤوليتي" المذاع على قناة "صدى البلد": "لحد دلوقتي نتايجنا وحشة، مش دي نتائج مصر، أتمنى معاهم بكرة وبعده يعملولنا حاجة، عندنا الخماسي والتايكوندو ورفع الأثقال وخلاص البطولة بتخلص".

وأضاف: "إحنا طول الوقت داعمين للبعثة الأولمبية وأنا واحد من الناس من الداعمين من أول لحظة واستضفت 6 رؤساء اتحادات وكان الدعم كامل من أول لحظة حتى اللي بيتغلب، النتائج لحد دلوقتي لا ترضي الرأي العام، لعل وعسى بكرة ترضينا بكرة وبعده نجيب تلات أربع ميداليات كمان".

وتابع: "في أبطال خرجوا كان مقدر أنهم يخدوا ميداليات، إحنا بنلاعب أحسن ناس في العالم أكيد وأنت متدرب على كده رايح تنافس مش تدلع، رايح تجيب ميدالية محمد السيد لما جاب لنا ميدالية برونزية الكل بيحتفل بيه".

وواصل: "الميدالية الوحيدة اللي حصلنا عليها حتى الآن ويا رب بكرة يبقوا أربعة ولا خمسة ولا ستة ولا سبعة، سيادة الوزير كان وعد من بين 7 إلى 11، 11 بقت صعبة ولو وصلنا لسبعة نبقى تجاوزنا طوكيو، الأمر يتطلب حاجات كتيرة نخلص البعثة ويرجعوا بالسلامة ولكل حدث حديث عشان الأوضاع والأمور تبقي في السياق".

وأوضح: "لا الدولة قصرت ولا إحنا قصرنا وكل الإمكانيات متاحة للأبطال والاتحادات وعلى قدر الدعم والمحبة على قدر الزعل، بتكلم على مصر واللي يحب مصر يشوفها دايما في العالي، الأولمبياد بتفرج تقريبا 80-85% من الماتشات سواء فردي أو جماعي، ولادنا وأبطالنا وحتى أشقاء العرب بتفرج عليهم".

واختتم: "على قدر دا لازم يكون لينا كلام آخر، ولادنا وأبطالنا الساعات اللي جايه عندهم منافسات، إن شاء الله ندعيلهم يرفعوا علم مصر، ويجبولنا ميداليات إضافية عن البطل محمد السيد".