مصطفى بكري: مصر هتبقى من أكبر 10 اقتصادات في العالم خلال 10-15 سنة
أكد الإعلامي مصطفى بكري، أن الدولة حققت كثير من الإنجازات في كافة القطاعات طوال الفترة الماضية، مشيرًا إلى أن البلاد في تقدم دائم.
وقال بكري خلال برنامج "حقائق وأسرار" المذاع على قناة "صدى البلد": "في ألف كيلو متر حدودنا مع ليبيا، في جيش لازم تعرفوا اللي بيحصل في الشمال الشرقي في مخاوف من مؤامرات الصهاينة واللي بيعملوه عشان كده إحنا دايمًا على يقين أن بلدنا هتعدي وأن بلدنا هتعدي أي أزمة وتعدي".
وأضاف: "رئيس الوزراء قال طبقا لتقديرات الجهات الدولية، في ظرف من 10-15 سنة مصر هتبقي من أكبر 10 اقتصادات في العالم ودا مش كلامه دا كلام جهات دولية عديدة وانا على ثقة ان المعدل اللي بنمشي بيه دلوقت مش إمبارح، إمبارح عملنا إنجازات كبيرة جدا واتبنت بنية تحتية في مصر لا أحد ينكرها".
وتابع: "وأنا رايح مؤتمر العلمين كان معايا السواق وحد تاني وقفنا عند بنزينة وإحنا في طريق العلمين جالي مواطن بسيط سلم عليا أنا بشوفك في التلفزيون وقالي أنا عايز أقولك إن اللي اتحقق في بلدنا عمره ما اتحقق".
وواصل: "مشكلة الناس أن كل واحد بيشوف الحتة اللي هو فيها مبيشوفش ككل، ركزوا في الاعلام ووروا الناس اللي بيحصل في الصناعة والزراعة، إحنا كلنا مطالبين أن نطلع الناس على المعلومة الصحيحة وبنتكلم ونرفع المشاكل لصانع القرار ونرفع أي معوقات لوزير الاستثمار".
واختتم: "أنا بقولكم في أمل اوعوا تفقدوا الأمل مصر باقية بتاريخها وحضارتها وشعبها العظيم والقائد اللي انحاز للشعب المصري في 3 يوليو وقف وتحمل وأوعوا تنسوا الكلام ده، طول ما أنت مقتنع بالبلد دي والوطن دا والأمة العربية وفلسطين قضيتنا القومية ومشاكلنا اللي في كل مكان هننتصر".
