عاجل.. رئيس الوزراء يوضح سبب إعلان زيادات أسعار البنزين في الإجازات

أعلن الدكتور مصطفى مدبولي رئيس مجلس الوزراء، عن أسباب اتخاذ قرارات زيادة أسعار المحروقات في أيام الإجازات.

وقال مدبولي، في مؤتمر صحفي، مساء الثلاثاء: "لما بزود الأسعار لازم يكون فيه تنسيق وتفاوض مع كل سائقي النقل الجماعي".

وبخصوص اتخاذ القرار في يوم إجازة، أضاف: "المواطن بيكون في بيته، بيحصل تواصل مع السائقين، أزود أد إيه، طب افرض زودت في ساعتها، المواطن في الشارع رئيس الوزراء قال والسائق قال بدل 7 جنيهات هيكون 10 جنيهات، هيحصل إيه في الشارع، هينزل يتخانق مع السائق، فيه آليات لازم أضمن بها عدم حدوث قلائل".

وتابع: "عملنا تنسيقات، كل محافظ اتفق مع الروابط على التعريفة، عشان نضمن إن المواطن يصحى يركب عربية وميحصلش مشكلة، سهل جدا أقول الكلام بس هيحصل إيه بعد ساعة، لازم فيه تقدير معين، يوم الإجازة عشان ميكونش فيه قلق، وأقلل الخلاف الوارد يحصل بين مقدم ومتلقي الخدمة".

واستكمل: "مقدرش أعلنها بصورة مسبقة، أقول بكرة هعمل ده، عارفين إيه اللي هيحصل، هيخزنوا، هنلاقي ممارسات لا حد لها، لازم يكون فيه موائمة معينة، وبيكون فيه أرقام".

وذكر مدبولي: "يقولك الحكومة بتنكد علينا دايما في الإجازات، مش ده الهدف من الموضوع، المواطن قاعد في البيت، بيحصل تنسيقات، وعشان يبقى خلاص عرف الخبر، وبالتالي نزل وعرف وكل محافظة تعلن تعريفة قد إيه، المواطن عامل حسابه بدل ما يحصل مشكلة".