أول تعليق من محمد السيد بعد تحقيق أول ميدالية لمصر في أولمبياد باريس

عبّر محمد السيد، لاعب منتخب مصر لسيف المبارزة، عن سعادته بفوزه بالميدالية البرونزية الأولى لمصر في دورة الألعاب الأولمبية المقامة في فرنسا.

وقال السيد في مداخلة مع قناة "إكسترا نيوز": "شعور ميتوصفش الحمد لله افتتحت ميداليات البعثة المصرية في أولمبياد باريس وإن شاء الله دي بداية لسلسة ميداليات جاية، بالنسبة لي بطولتي مخلصتش، عندنا بطولة الفرق وإن شاء الله نحقق ميداليات فيها".

وأضاف: "قبل الأولمبياد كان في معسكر في إيطاليا لأكثر من 3 أسابيع واتوفر لينا كل الإمكانيات عشان نؤدي بالمستوى ده وبشكر الوزارة واللجنة الأولمبية والبنك الأهلي على الدعم عشان نقدر نؤدي بالمستوى دا ونحقق ميدالية".

وتابع: "مواجهة بطل المجر على البرونزية كانت الأولى لنا، الدولة موفرة كل حاجة من إمكانيات وأجهزة فنية وطبية ومعد رسمي واللاعيب مش بيكون بيفكر في حاجة غير الماتش بتاعه وإزاي يكسبه".

وأوضح: "مجهود كبير مقدرش أوصفه مش مجهود شهر بس ولكن تخطيط من بعد الأولمبياد اللي فاتت إزاي نقدر نجيب ميدالية وأحب أوجه رسالة لأي حد ركز على حلمك مهما كان قدامك صعوبات وخليك قريب من ربنا عشان من غيره مش هتحقق أي حاجة".

وأكمل: "أنا لعبت في أولمبياد 2018 و2020 ودي التالته، أنا عندي 21 سنة وبحمد ربنا على الإنجازات دي ودي لسة البداية مش النهاية، هنلاعب المنتخب الفرنسي على أرضه وبين جماهيره، الأرض بتلعب مع صاحبها وإن شاء الله نكسر القاعدة دي".

واختتم: "بشكر كل الناس اللي دعمونا على السوشيال ميديا أو أي طريق تاني والناس اللي دعوا لينا أكيد دا عمل فرق وخلينا ورا الأبطال الأيام الجاية ولو حد متوفقش ميقسوش عليه".