تامر أمين يعلق على تحية جماهير الزمالك لمحمد الشيبي: "بتحيوه على أيه؟"
علق الإعلامي تامر أمين، على قيام عدد من جماهير الزمالك بتحية محمد الشيبي لاعب بيراميدز خلال مباراة الفريقين الأخيرة في الدوري.
وقال أمين خلال برنامج "أخر النهار" المذاع على قناة "النهار": "في حتة صغيرة؛ ليا عتاب على بعض الجماهير اللي هتفت امبارح للشيبي؛ أنت تهتف لأي لاعب أنت حر براحتك ولكن لازم الجماهير يبقي عندها حكمة في الهتاف والتشجيع خصوصا جماهير الزمالك اللي بتعمل دخلات وتيفوهات عظيمة".
وأضاف: "امبارح الهتاف بتاع بعض من جمهور الزمالك لمحمد الشيبي لاعب نادي بيراميدز؛ بعض الناس هتفوا راجل ياشيبي والشيبي راح لهم وشكرهم؛ أنا عارف أن ده ممكن يكون نكاية في حسين الشحات والنادي الأهلي ودا بشوفه طول الوقت ودا تحفيل هيفضل موجود".
وتابع: "أنا بتكلم هنا عن رسالة أو فلسفة الهتاف؛ انت هنا بتحيي الشيبي على ايه؟ الشيبي كلنا بنقول أنه غلط بما فيها نادي بيراميدز زي ما حسين الشحات غلط وقلنا أنه غلطان ولكن كلنا بعد الماتش الأخير بين الأهلي وبيراميدز كلنا طلعنا وقولنا للشيبي مهما كنت مستفز مينفعش تدخل الدخلة دي على أي لاعيب لأن دي دخله فيها أذى وكان ممكن تكسر له القصبة وتبطله كورة".
وأوضح: "كلنا أدنا هذا الكلام ونادي بيراميدز وإدارته عاقبت الشيبي على هذا التدخل وافقد بيراميدز لاعب مهم؛ لما بعض الجماهير تقوله راجل يا شيبي كأنكم بتحيوه على أنه كان عايز يأذي الشحات أو أن التدخل كان صح؛ هنا بقي عتابي التحفيل لا يخل بمنافسة كرة القدم؛ أنا احفل عليك زي ما أنا عايز لكن لا أتمنى الضرر لحد".
واختتم: "كلامي لجماهير الأهلي والزمالك وكل الجماهير نحفل زي ما احنا عاوزين ولكن نحافظ على فكرة أنها منافسة ميبقاش فيها أذي أو حد يتضر".
