محمد صبحي: المتغطي بأمريكا عريان.. ومحاولة اغتيال ترامب مش حاجة جديدة (فيديو)

أكد الفنان محمد صبحي، أن رؤساء الحكومات الإسرائيلية المتتالية يعتبروا مدير واحد لمؤسسة كبرى تسمى الصهيونية.

وقال صبحي خلال برنامج "نظرة" المذاع على قناة "صدى البلد": "تصريحات العدو كانت تحت الطرابيزة كنا نقول دا احتمال وواحد بيفسرها نقوله لا أنت غلطان إنما دلوقت عدوك بيقول أنا هعمل فيك كذا وحاجة من اتنين أما بيهوشك ومش هيعمل أو هيعمل بجد".

وأضاف: "أنا ونيس، مسلسل ونيس من الأعمال اللي كنت فيها محمد صبحي، وأيضًا مسرحية ماما أمريكا، وأنا كنت بعمل دور مصري واعي أن المتغطي بأمريكا عريان، 9 رؤساء أمريكيين تعرضوا لمحاولات الاغتيال وبالتالي محاولة اغتيال ترامب مش حاجة جديدة".

وتابع: "في أربع رؤساء أمريكيين اغتيلوا، ولما حصلت حكاية ترامب شوفت الصورة الأولى قلت طيب الرصاصة ازاي مقتلتوش؟ لغاية لما جه الكادر وأن في دم جنب ودنه وأن الرصاصة مشيت من جنب ودنة بص في الكدر وراه 400 واحد لو واحد اتصاب والرصاصة جات في واحد زي ما هما قالوا الناس اللي حوالين اللي مات ده هيحصل دوشة".

وأكمل: "بعدين يقولك يقال إن اللي ضرب الرصاصة اغتيل؛ وأنا في الحاجات دي بلدهم أشبعوا بيها، في حاجة كان غيري بيقولها ياسلام لو الراجل ده إسحاق رابين لو يمشي القضية هتتحل بعد شوية يقولك يا سلام لو شامير ده يمشي ولو شارون يمشي ولو نتنياهو يمشي لغاية النهاردة يقولك لو نتنياهو يمشي القضية هتتحل".

وأوضح: "دول كلهم مدير واحد لمؤسسة كبرى اسمها الصهيونية بس دا مدير دمه خفيف ودا مدير مكشر ودا مدير هادي ولكن كلهم يكرهون العرب والمسلمين والفلسطينيين والأمريكان نفس الموضوع، الشباب الأمريكي قالهم أنتوا مش قادرين تقفوا أمام تهجير الفلسطينيين؟ واتكشفت أمريكا".