شاهد.. تامر أمين يرصد جولات الوزراء الميدانية: "يبدو أنها تعليمات"
علق الإعلامي تامر أمين، على تكرار نزول الوزراء في الحكومة الجديدة إلى الشارع للتواصل مع المواطنين وحل المشكلات على الأرض.
وقال أمين خلال برنامج "أخر النهار" المذاع على قناة "النهار": "في حاجة هي متعلقة بحركة أنا متابع حدوثها خلال التلات أربع أيام اللي فاتوا ولما لقيتها بتحصل وبعدين بتكرر وبعدين بتكتر، اكتشفت أنها غالبا مش وليدة الصدفة غالبا بناء على توجيه أو تكليف أو تعليمات إيه بقى الحاجة اللي بتحصل دي؟ فكرة نزول الوزراء الجدد في الحكومة الجديدة للشارع".
وأضاف: "بقالنا حوالي 10 أيام عندنا حكومة جديدة وخلال الـ10 أيام دول في قصة مختلفة بتحصل، دون بقي التفاصيل، وزير العمل اللي هو أنا عمري ما كنت سمعت أنه بينزل، وزير العمل الجديد نزل وراح مديرية العمل في الجيزة والتقى بعمال".
وتابع: "وزير الثقافة الجديد أعتقد أنه إمبارح كان في إسكندرية وقصور ثقافة ومناطق أثرية وثقافية وبيشوف ويتابع ويراقف وزير الزراعة نزل وراح البحيرة والمنوفية".
وواصل: "وزيرة التنمية المحلية نزلت وعملت جولات ميدانية وقريت خبر أنها أحالت حوالي ألف موظف في المجالس المحلية للنيابات المختلفة، دا خبر رسمي كان نازل إمبارح أو أول إمبارح النيابات المختلفة يعني اللي عامل جناية راح النيابة العامة واللي عامل مشكلة راح النيابة الإدارية في 1300 الدكتورة منال وقعتهم خلال 10 أيام، ولو كملت كده المجالس المحلية هتبقى فلة".
وأكمل: "أنا كلي ثقة في منال عوض أنا متابعها من خلال نشاطها السياسي ونجاحها في محافظة دمياط شيء في منتهى الصعوبة ودا اللي أهلها لأنها تتولى منصب وزير التنمية المحلية".
وذكر: "هذا النزول المكثف والمتكرر لمعظم الوزراء الجدد أكيد مش صدفة فيبدو أنه توجه، وأنا في تقديري دون معلومة لكن يبدو من القراءات اللي إحنا شايفينها ومن توالي نزول الوزراء الجدد إلى الشارع أنها تكليف وأوامر مباشرة من القيادة السياسية للحكومة الجديدة".
واختتم: أنا الحقيقة سعيد جدًا بهذا الذي يحدث، وأتمنى من الله أنه يستمر متبقاش بقى الغوربال الجديد اللي ليه شدة فالوزراء سمعوا الكلام ولسه مركزين فيه فيعملوا الكلام ده أسبوعين شهر شهرين ونريح في مكاتبنا تاني".
