شاهد.. تامر أمين عن التعليقات على ظهوره بنظارة شمس: "سلوك عدواني"
![الإعلامي تامر أمين]( /UploadCache/libfiles/20/8/600x338o/669.jpg)
علق الإعلامي تامر أمين، على سخرية البعض على ظهوره خلال البرنامج الذي يقدمه مرتديا نظارة شمس وذلك كوقاية من الضوء بعد أن أجرى عملية جراحيه في عينيه.
وقال أمين خلال برنامج "آخر النهار" المذاع على قناة "النهار": "عايز أبدأ مع حضراتكم بلقطة مش متعلقة بيا، مش هتوقف قدامها عشان متعلقة بيا ولكن متعلقة بيكم، في حالة من حالات العنف في حالة من حالات التجاوز في حالة من حالات التعدي في حالة من حالات الاصطياد موجودة عند جزء مش قليل من الناس ومش عارف سببه إيه".
وأضاف: "حد هيقولي يا تامر ممكن الأوضاع صعبة، صعوبة الأوضاع المفروض تخلي الناس أحن على بعض، صعوبة الأوضاع تخلي الناس قلبها على قلب بعض مش تخلي الناس تاكل في بعض وتعض في بعض وتهبش في بعض".
وتابع: "سلوك غريب ومحدش يفسر السلوك العدواني والسلوك الاصطيادي بأن الأوضاع صعبة والواحد مش مستحمل، إمبارح وأنا قاعد بالليل بعد ما خلصت الحلقة فقاعد بتفرج في بعض الفيديوهات ليا نزل على السوشيال ميديا فأنا طالع بنضارة شمس عشان موضوع عنيا وشرحت إمبارح لحضراتكم إني عامل عملية تقيلة، والمفروض إني أريح والدكتور قالي لو نزلت التلفزيون تلبس نضارة غامقة لأن الضوء المباشر يضرك ضرر بالغ".
وواصل: "لقيت بعض التعليقات اللي نازلة على الفيديوهات يمكن مسمعوش الجزء الأول إني مريض أو متوعك بس تلاقي التعليقات ماشية في سكة إيه يا عم دا جاي يورينا جمال نضاراته، حوش ياعم دا الشمس واضح أنها جامدة عندهم في الاستوديو".
وأوضح: "محدش مفترض للحظة أن عندي أكيد سبب مش طالع في دماغي جدا أني أطلع بنضارة شمس باليل؛ في بعض الناس كتبولهم دا تامر عامل كذا وادعوله بالشفاء، ولكن أنا بتكلم حتى اللي مش عارف أو معندوش معلومة، أنا مش زعلان والموضوع لا يعنيني ولكن باخد التعليقات بمحمل عام بحاول أقرأ من خلالها مؤشرات وسلوك الناس والمزاج العام بتاع الناس".
واختتم: "اكتشفت أن المزاج العام في جزء كبير منه هجومي، أهاجم الأول وبعدين أفهم ولازم الأول ألوش بكلمتين وبعدين يحلها الحلال؛ القصة صعبة جدا والحياة مش هتمشي كدا".