مصطفى بكري يحذر من التشكيك في مؤسسات الدولة
![الإعلامي مصطفى بكري]( /UploadCache/libfiles/20/8/600x338o/471.jpg)
أكد الإعلامي مصطفى بكري، أن الشعب المصري تحمل الكثير خلال السنوات الماضية، مشيرا إلى أنه يريد الحفاظ على وطنه.
وقال بكري، خلال برنامج "حقائق وأسرار" المذاع على قناة "صدى البلد": "دي بلدكم كلكم وأنا خايف على البلد دي وعلى أحفادي وعلى ولادي، ما أسهل الكلام وما أسهل أن تزايد ويتسقفلي وما أصعب أن تقف مع بلدك وتقول يا جماعة حافظوا على البلد ويقولك الحق بيطبلوا".
وأضاف: "هو مطلوب أن أجيب معلومات مغلوطة وأقول الحقوا الدولة مش عارف إيه؟، أيوة في أخطاء ولكن بنقوم الأخطاء زي أي بيت لما يبقى عندك مشكلة مع عيل ولا اتنين مبتهدش البيت على اللي فيه بتجيب الولد وتقعد تحل معاه المشكلة".
وتابع: "الإنسان المصري عنده قناعه وطول عمره طالب الستر لا طالب شمال ولا يمكن وكل واحد بيطلع الصبح يقول يا رب استرها معايا ومع ولادي، وكمان لازم تقول كلمة الحق وإذا موقفتش مع بلدك في الوقت ده وموقفتش مع كل حاجة صح واتكلمت على كل حاجة غلط إحنا هنضيع بجد، ربنا حامي البلد دي صحيح وجيش مصر القوي صحيح والشرطة صحيح والرئيس عبد الفتاح السيسي 24 ساعة في الـ 24 صحيح وأكيد في أشياء محتاجة نقاش ورؤية، ولكن وأنت بتتكلم وبتقول وبتفتح ملفات حذاري من التشكيك في المؤسسات وأن تردد كلام المجموعة الإرهابية أصحاب المصالح".
وأوضح: "دول لا بيبكوا على شعب ولا بيبكوا على دولة دول بيشمتوا لما بنتهزم في مباراة كورة؛ هو أنا عشان يبقالي موقف ونزلت من على الحكم يبقي اشمت في الشعب ده؟ بيت يقع تلاقيهم شمتانين في الناس اللي ماتوا تستاهلوا والعيال اللي بتطلع برة بتقول لو لقيت أي ظابط أقتله ".
وأكمل: "العشر سنين اللي مروا دول السيسي شاف كتير واتألم كتير وتعب من حاجات كتير وإحنا عدينا ووفقنا وصمدنا واتحملنا وكان عندنا أمال أكتر، أزمة الكهربا هتخلص خلال فترة وجيزة وهتنتهي".