لاعبة الدراجات جنة عليوة: أنا الوحيدة في مصر اللي عايزة شهد تشارك في الأولمبياد

قالت جنة عليوة، لاعبة الدراجات، والتي تعرضت للدفع المتعمد من اللاعبة شهد سعيد في بطولة الجمهورية للدراجات إن، حالتها الصحية في تحسن موضحة أنها لازالت تقوم بالتأهيل.

وقالت عليوة، خلال برنامج "الماتش" المذاع على قناة "صدى البلد": "أنا تقريبًا الوحيدة في مصر التي أريد أن تسافر إلى الأولمبياد حتى يصبح الموضوع واضحًا وصريحًا، وأنا أشهد من الآن أنها ستحقق المركز الأخير؛ لأن دا مستواها الرياضي".

وأضافت: "الكلام ده مش من دماغي، ولكن دا من النتائج، أنا في سباق الجمهورية مكنتش أعرف أنها مشاركة في الأولمبياد وأنا مش فارق لي في حاجة أنها تكسب أو متكسبش، إحنا في السبق عاملين الخطة بتاعتنا صح ومظبوط ومش طبيعي أبدًا يبقى في اتنين قريبين من بعض كده".

وتابعت: "مكانش في معرفة بينا قبل المشهد ده، اتقابلنا قبل كده في سبق وكنت عاملة عليها 6-7 لفات والسنة اللي بعديها أختي قابلتها في سبق تاني، أختي عملت عليها نص ساعة، يعني أختي عملت الفينش وشهد عملت الفينش بعدها بنص ساعة".

وأوضحت: "حصل منها قبل الواقعة، السبق كان لفتين إحنا بنلف الدوران، وهي عايزة تلف الأول، وإحنا كنا أربعة أو خمسة وكانت بتنزل وبتشتم وبتقول ألفاظ مقدرش أقولها، والهدف كانت تنزلني لورا أو توقعني عشان مدخلش الفنيش".

واختتمت: "كان ممكن الموضوع يعدي لو حتى كانت اعتذرت، حتى الاعتذار مبيردوش، وعايزة أرد على كابتن محمد اللي بيقول إننا رفعنا محضر ولكن المستشفى هي اللي عملت المحضر كاجراء طبيعي من المستشفى، وهو بيقول إنهم جم زارونا ودا محصلش".