خيري رمضان عن الجدل حول وزير التعليم: "خدنا أيه من الدكترة؟ خلينا نجرب"
![الإعلامي خيري رمضان]( /UploadCache/libfiles/20/7/600x338o/957.jpg)
علق الإعلامي خيري رمضان على حالة الجدل التي أثيرت على تعيين محمد عبد اللطيف وزيرا للتعليم بسبب درجته العلمية.
وقال رمضان خلال برنامج "مع خيري" المذاع على قناة "المحور": "احنا مشكلتنا مع الدكتور محمد عبد اللطيف ايه بالظبط؟ البيانات اللي اتقدمت عنه زي ما قالت الرقابة الإدارية كلها صحيحة؛ هل تم اختيار الدكتور محمد عبد اللطيف لان معاه دكتوراه؟ هل احنا زعلانين لأن الدكتوراه دي كانت عن بعد؟".
وأضاف: "أنا شايف أن الدكتور محمد لو قدم أوراق مزورة أو غير قانونية وهو بيتقدم لهذا المنصب هذه جريمة؛ طيب إذا كان واخد دكتوراه بالمراسلة ومستغلهاش في حاجة لا بيدرس ولا عمل معادلة والتعامل مع الازمة بيتم بشكل عشوائي وكان على مجلس الوزراء أن يسارع في توضيح البيانات ويقول احنا عارفين أنه واخد الدكتوراه كذا وأن احنا مختارينه عشان 25 سنة خبرة واحنا مش جايبينه عشان دكتور ولا يوجد تزوير عشان نختصر الكلية وحشة الجامعة اللي خد منها مش جامعة مش دي القضية".
وتابع: "أنا مش بدافع عنه أنا أعرف السيدة والدته واعتقد أني التقيت بالدكتور من زمن بعيد وكان أول حد بيفكر في التابلت وكان عقله مستنير بصراحة ووالدته الدكتورة نرمين إسماعيل كريمة المشير أحمد إسماعيل وزير الدفاع المصري بطل حرب أكتوبر".
وأوضح: "عندما نحكم عليه دعونا نحكم عليه بالتجربة لأن هتعمل أيه دلوقت أنت معترض على أيه؛ معاهوش دكتوراه اسمه الدكتور محمد عبد اللطيف هل كل وزير لازم يكون معاه دكتوراه؛ وزارة التربية والتعليم كل اللي فيها دكاترة؛ الدكتور أحمد فتحي سرور كان دكتوراه في القانون والدكتور طارق شوقي كان دكتوراه في الهندسة في الإدارة لازم نتخلص من الدرجات العلمية".
واختتم: "احنا واقفين قدام الدكترة؛ الدكترة عملت لنا ايه دا احنا متبهدلين دكترة؛ طب هل معني كده أن نجيب أي حد أنا لا اقصد هذا أنا أقصد أننا جايبين ممارس واحد على الأرض وتعامل مع الطلاب لمدة 25 سنة واحد عنده أفكار بيطرحها؛ نعمل ايه؟ نستناه شوية".