شاهد.. أحمد موسى لوزير التموين: خلي رغيف العيش بعشرين لكن بشرط الناس تعرف تأكله
أكد الإعلامي أحمد موسى، أن وزراء الحكومة الجديدة يجب أن يتواجدوا في الشارع وسط المواطنين لمتابعة مشكلات الناس.
وقال موسى خلال برنامج "على مسؤوليتي" المذاع على قناة "صدى البلد": "كل واحد النهاردة أقسم والقسم يؤدى، وبالتالي كل واحد ينزل الشارع وأتمنى السادة الوزراء، الشارع انزلوا قابلوا الناس وشوفوا مشاكل الناس".
وأضاف: "وزير التربية والتعليم لازم أشوف المدارس في الصعيد، الوزير محمد عبد اللطيف أرجوك سافر الصعيد واتفرج على المدارس بس، الدكتور خالد عبد الغفار بينزل ويشوف المستشفيات وبيعمل جولات الفريق كامل الوزير بينزل على طول".
وتابع: "أرجو الوزراء اللي عندهم عمل واتصال بالناس، وزير التموين سيادتك يا فندم العمل انزل بص على الناس واطمن وشوف المخابز والرقابة والعيش اللي زاد ووزنه قل، خليه بعشرين مفيش مشكلة ولكن خلي الناس تعرف تأكله لازم يتشاف ده السيد وزير التموين".
وأوضح: "حد يقولي وزير التموين ينزل يبص ويعمل زيارات مفاجأة أنا كوزير لازم انزل وأبص إنما أقعد في المكتب لا مش هينفعنا خالص المكاتب الفترة اللي جاية".
وأكمل: "الحكومة قدامها تحديات غير مسبوقة، هذه الحكومة أسهل من الحكومة اللي فاتت، الحكومة اللي فاتت جهزت حاجات كتيرة جدا، البنية التحتية خلصنا، بنعمل اه حاجات تانية، السيد وزير الاستثمار الجديد أهم حاجة شغل من أول ثانية".
واختتم: "إحنا مشغولين ببلدنا وكلكم مشغولين ببلدكم وكلكم جايين عشان تخدموا البلد، ومفيش حد مبيحبش مصر إلا أعداء مصر، أنا بتكلم على الجميع النهاردة، العمل مستمر والدكتور مصطفى مدبولي بيتابع وينزل الشارع والدكتور عمرو طلعت عامل شغل والسيد شريف فتحي وزير السياحة الجديد الراجل ده كان وزير الطيران وعنده خبره في ده وخبره في ده".
