تامر أمين يعلق على عودة الزمالك لمباريات الدوري: "خليتونا مضحكة قدام العالم"
علق الإعلامي تامر أمين على عودة نادي الزمالك إلى خوض مبارياته في الدوري بعد أن أعلن في وقت سابق عن نيته الاعتذار عن استكمال البطولة.
وقال أمين خلال برنامج "أخر النهار" المذاع على قناة "النهار": "الكلام اللي هتكلمه عن موقف نادي الزمالك مؤخرا وأنا شايف أنه في وقته لأن دلوقت نادي الزمالك بيلعب ماتش قدام نادي سيراميكا؛ أنا عندي سؤال بسأله لمجلس إدارة نادي الزمالك؛ هو اللي انتوا عملتوه ده اسمه إيه؟ حد يقولي لأن أنا اقسم بالله ما لقيله مسمى".
وأضاف: "حد هيقولي ده موقف؛ والموقف خلص النهاردة هو الموقف ده مجزأ بيمشي على سطر ويسيب سطر حد يقولي اللي الزمالك عمله الأسبوع ده اسمه إيه؛ إيه يا زمالك على فكرة نادي الزمالك نادي كبير أوي وعلى فكرة كابتن حسين لبيب شخص محترم وكل أعضاء مجلس الزمالك حبايبنا وأصدقائنا وناس خلوقة جدا".
وتابع: "أنا بتكلم على الفكر اللي عملوه مش لاقيله مسمى؛ أنا بقولهم ياجماعة أنتوا ماسكين نادي كبير مينفعش تعملوا فيه كده أنا مش عارف ايه اللي بيصيب مجالس إدارات نادي الزمالك".
وواصل: "لما نيجي نلعب ماتشاتنا ومرة واحدة بسبب خطأ تحكيمي قولنا مس هنلعب لا أصل الدوري مش منضبط والأهلي ليه مؤجلات كتير ايه علاقة ده بالخطأ التحكيمي؛ انت لو معترض على المؤجلات هتعترض عليها من بداية لعبك للدور التاني ولكن انت تعرضت للخطأ التحكيمي ايه علاقة ده بالمؤجلات وترتيب الدوري والعدالة".
وأوضح: "وبعدين خلاص عملت أشوس من الأشاوس وقلت مش هلعب؛ بتعمل ايه دلوقتي مع سيراميكا كيلوبترا؛ بتخلوا منظر الكرة المصرية وحش ومنظرنا مضحكة قدام العالم كله وخليت كده فرصة للمتقولين اللي قالك إن الزمالك كان خايف يلعب مع الأهلي؛ وأنا عارف أن دي الحقيقة؛ هتخاف من الأهلي ليه دي مباراة بتلات نقاط وانت كسبان في أخر مباراة".
وذكر: "ليه بتعمل في نفسك كده؟ ثم بقي المنظومة بقي حلويات منظومة كرة القدم قالك أصل رابطة الأندية واتحاد الكرة اعتبروا أن اللي عمله الزمالك ده اعتذار وليس انسحاب؛ اشمعني؟ ايه الفرق بين الاعتذار والانسحاب".
واختتم: "قولولي في انهي كوكب بيحصل الكلام ده أنهي كوكب بيحصل فيه ما يحدث في الكرة المصرية وبعدين الزمالك يعتذر وزير الرياضة مع رئيس الرابطة مع رئيس الزمالك يقعدوا عشان يحلوها بلدي".
