وحشتني حياة الانطلاق.. منال عبد اللطيف تثير الجدل بفكرة قلع الحجاب والعودة للتمثيل

تتصدر الفنانة المعتزلة منال عبد اللطيف محركات البحث الشهيرة "جوجل"، بعد أن أثارت الجدل بفكرة قلع الحجاب والعودة إلى التمثيل، بالإضافة إلى حديثها عن العديد من الأسرار حول حياتها الشخصية، والتي كشفت عنها لأول مرة.

تصريحات منال عبد اللطيف عن الحجاب

وخلال استضافتها في برنامج قعدة ستات مع المذيعة مروة صبري، تحدثت منال عبد اللطيف، عن العديد من الأسرار حول حياتها الشخصية، إلى جانب علاقتها بنجوم ونجمات الوسط الفني، وعن ما إذا كان هناك فرصة للعودة لمجال الفن مرة أخرى.

وقالت منال عبد اللطيف، عن ارتدائها الحجاب، "مبحبش الروتين في حياتي، ففجأة كده لوحدي قولت مش عايزة أكمل شغل انا عايزة اتحجب، وقرار الحجاب كان بقاله أكتر من سنة بيراودني لكن انا كنت مترددة إلا أن الحمد لله ربنا شاء وصحيت من النوم قلت أنا هتحجب".

وأضافت عبد اللطيف، "كان في التوقيت ارتداء الحجاب، أنا شغالة مسلسل كيد النسا الجزء الثاني وكنت ماضية 5 مسلسلات واخدت القرار أني هتحجب وهقعد وكلمت كل الناس اللي كنت لسه هبدأ معاهم شغل وقولت لهم أنا اتحجبت قالولي اتحجبتي ازاي انتي شغالة مع فيفي عبده وعندك مسرح بالليل قولت لهم، اللي بدأته هنهيه، لكن اللي مبدأش مش هعمله وكان قرار".

قرار اعتزال الفن

أما عن قرار اعتزال الفن، أشارت إلى أن "لما أخد قرار وأفكر وأقول تمام هبدأ، وكل صحابي بيقولولي أقلعي الحجاب وانتي محجبة ليه حرام، وكل الفنانين اللي اشتغلت معاهم قالولي كده في الفترة الانتقالية بتاعتي كلهم بلا استثناء، ولما اتقابلنا في حفلات خارجية بعد كده بره كانوا بيقولولي ليه حد يغطي الشعر الحلو ده".

وتابعت: "أنا ليه بفكر أني أقلع الحجاب، ليه الفكرة بتراودني لأن أوقات بتوحشني منال المنطلقة، وأنا بطبيعتي منطلقة وأوقات بتوحشني منال وابقى عايزة انطلق في كل حاجة وأن مفيش حاجة تقيدني، ولكن سريعًا بقول لأ أنتي تدعي ربنا أنه يثبتك لأن دي خطوة مش هينة على طول برجع لدماغي فورًا ولكن بتراودني الفكرة طبعًا بتراودني".

فكرة خلع الحجاب

واستكملت: "وكل ما بتيجي الفكرة على بالي وأول يا منال اقلعي بقى الحجاب وبعدين أقول لنفسي انتي اخدتي الخطوة وقعدتي السنين دي، والفكرة اللي بتلح عليا أن إن شاء الله لما بنتي الكبيرة فرح تتجوز بفكر أني في الفرح أقلع الحجاب مش عارفة ليه بس الفكرة دي بتزن عليا ومش ضروري ألبس فستان مفتوح أهم حاجة أني أكون منطلقة لأن دايمًا الطرحة بتضايقني وأقعد طول الوقت أظبطها، وبقالي 11 سنة محجبة".

وعن نظرة المجتمع لها إذا قررت خلع الحجاب، اختتمت قائلة: "أنا بحترم رأي الناس ولكن في مناطق شخصية بتاعتي مش بتاعتكم محبش حد يتدخل فيها، ورأي الناس يحترم، لكن أنا اللي على قناعتي هعمله وطالما مابيضرش حد يبقى محدش له دعوة بيا، وحتى السوشيال ميديا مبخافش منها، وأنا مابيشغلنيش غير دائرتي الأولى جوزي ووالدي وبناتي وصديقاتي المقربات غير كده اللي برا دايرتي براحته".

آخر أعمال الفنانة المعتزلة منال عبداللطيف

الجدير بالذكر أن أخر أعمال الفنانة المعتزلة منال عبد اللطيف، هو مسلسل "كيد النسا 2"، والذي تدور أحداثها حول خروج حلاوتهم من السجن، ويتضح أنها الزوجة الأولي لأحمد بدير، يعود للحياة مرةً أخري زوج كيداهم، الذي يتضح أنه لم يمت بل حيٌ يُرزق؛ لتبدأ المشاكل تظهر حينما ترغب حلاوتهم في الانتقام من كيداهم، وتتصاعد الأحداث في جوٍ لا يخلو من الكوميديا.

ويشارك في بطولة مسلسل "كيد النسا 2"، عدد كبير من النجوم والنجمات، أبرزهم: "فيفي عبده، نبيلة عبيد، أحمد بدير، أحمد سلامة، أحمد الدمرداش، ميمي جمال، وغيرهم"، والمسلسل من تأليف حسين مصطفى محرم، وإخراج أحمد البدري.