عاجل| بكري: الرئيس أمر بمراجعة غلق المحال.. وأشك أن مدبولي درس قراره (فيديو)

أكد الإعلامي مصطفى بكري، أن مصر تمتلك احتياطي استراتيجي هو الأكبر طوال الفترة الماضية، مشيرًا إلى أنه يمكن استخدام جزء منه من أجل حل مشكلة الكهرباء.

وقال بكري، خلال برنامج "حقائق وأسرار" المذاع على قناة "صدى البلد": "آجي النهاردة أقولك اقفل، عشان أوفر قرشين على حساب مين؟، الشعب ده ليه قوة تحمل، ولولا ثقته في القيادة السياسية مكانش سكت، واللي عايز يقول كلام غير ده يقول".

وأضاف: "البلد دي لما راحت إحنا شربنا المر، وكلنا كنا على قوائم الاغتيالات، 36 إعلاميًا كان مطلوب اعتقالتهم في زمن الإخوان، إحنا مبنتكلمش من فراغ، إحنا شركاء في المركب، ولازم كل واحد فينا يحرص عليه، وعندنا ربان سفينة إنسان وطني قول اللي أنت عايز تقوله، حظه وحش والمشاكل حواليه كتير، ومفيش حد بيخدم معاه بإخلاص إلا قله، كل واحد مريح نفسه".

وتابع: "أنا النهاردة لما آجي أقول اقفل المحلات الساعة عشرة، أقسم بالله العظيم أنا مستغرب هذا القرار العشوائي يا سيادة رئيس الوزراء، أنت درست القرار ده؟، أشك أنك درست القرار ده من أساسه، لأنك لو درست القرار ده هتعرف أنك لما تقفل المحلات من 10 بنضرب السياحة، وبنكتر البطالة، وبنقطع رزق الناس".

وأكمل: "عشان أوفر كهربا يبقى آجي على دي، مش كفاية التلات ساعات؟، آجي على دي كمان، وأدي المصانع قفل 3-4 مصانع عشان وجود الغاز دا كله مينفعش، هذا الكلام لا يصلح الكلام ده خطر على النظام العام وعلى الأمن القومي، إحنا كل يوم فئة بتبقى محتقنة".

وأوضح: "أنا على يقين وعندي معلومات أن السيد الرئيس طالب بمراجعة القرار، شاف رد الفعل كويس هتراجعوه شيء جيد، الاعتراف بالخطأ فضيلة صححت مفيش مشكلة، أنا نفسي ميبقاش في القرار ده لو عايز تقفل أقفل بالنهار ساعتين بس سيب الليل كله، الطبيعي الكهرباء اليوم كله موجودة ونشوف حل للغاز في المصانع اللي بتقفل".

واختتم: "عندي معلومات أن السيد الرئيس تحرك لإنهاء قضية المصانع ودول عربية سيذكر التاريخ مواقفها معانا بالتأكيد لن تتخلى عن مصر، والنهاردة شركة أبو قير رجعت اتوفر لها الغاز".