عمرو أديب يطالب بتوزيع تخفيف الأحمال: "نعيش عيشة فل.. يا تقطعوا علينا إحنا الكل"

طالب الإعلامي عمرو أديب، بتوزيع تخفيف الأحمال بشكل عادل على المحافظات والمناطق المختلفة، مشيرا إلى أنه من غير الممكن أن يتم قطع الكهرباء في منطقة دون الأخرى.

وقال أديب، خلال برنامج "الحكاية" المذاع على قناة "إم بي سي مصر": "أنا مش عايز أشوف منطقة فيها فرح الدنيا ومنطقة تانية ظلام، يا نعيش عيشة فل يا تقطعوا علينا إحنا الكل، الكلام اللي بيقول إن في محافظات هيتم تخفيف الأحمال عليها على فترتين غير وارد".

وأضاف: "الاستيراد ده عشان بدل الـ3 ساعات يبقوا ساعتين والا عشان متقطعش تاني؟ دا تقديري إن بدل ما تبقى تلات ساعات تبقى ساعتين".

وتابع: "أرجوكم لا تجعلوا الموضوع أصعب، أنا ماشي معاك وفاهم عندك مشكلة، إنما أسيب الوزارة شوية لما آجي أسأل أسئلة مهمة، طيب أنت العجز عندك قد إيه طيب أنت هتوفي بوعدك إن في ديسمبر القادم لا يتم قطع الكهرباء".

وواصل: "طيب بلاش أنا أكلمك على المصانع والمقاهي والمطاعم الناس دي بتاكل عيش لازم تعرف هتعمل إيه، هل قطع الكهرباء مستدام هيكون شيء نعيش معاه على طول ولا هيكون في حلول ناجعة أخيرة". 

وأوضح: "الطلب اللي هطلبه ده شخصي في الموضوعات اللي زي دي لا يجب أن يتصدى حد للموضوع ده بمواجهة واضحة غير مجلس النواب، هو مفروض يجيب المسؤولين ويسألهم الأسئلة دي أين مجلس النواب المصري المواطن أكيد عنده تساؤلات وعنده غضب، هل الأحزاب بتقول بدورها والا هما بيروحوا يحضروا الجلسات".