أحمد موسى: درجات الحرارة مخيفة جدا.. وبيان زيادة تخفيف الأحمال متأخر (فيديو)

أكد الإعلامي أحمد موسى، أن الحكومة كانت يجب أن تصدر بيان قبل زيادة تخفيف أحمال الكهرباء، مشيرًا إلى أن للمواطن حق في المعرفة قبل اتخاذ القرار.

وقال موسى خلال برنامج "على مسؤوليتي" المذاع على قناة "صدى البلد": "لقيت رسائل وتليفونات، مواطنين مشاهدين محترمين قالولي يرضيك الكهرباء الجو نار، قطعت الصبح وقطعت من شوية وقطعت دلوقتي ناس بيبعتولي من أماكن مختلفة، كتير بيبعتوا ايه الحكاية؟ الكهرباء لما الاقي الكهرباء الناس بتتكلم طيب ياجماعة قررتوا تزودوا ساعة هذا المواطن له حق زي ما قلنا قبل كده أقول تاني هذا المواطن له حق على الدولة ومؤسساتها والحكومة أنه يعرف حق المعرفة حق الأخبار نقوله حضرتك لو سمحت عندنا مشكلة نتيجة للأحمال الكثيرة والاستهلاك الكبير اليومين اللي فاتو".

وأضاف: "بدأنا الصيف خلاص بقالنا يومين، الصيف السنادي مختلف مش عندنا بس من أول أمريكا وأنت جاي في لهيب بيحصل في العالم كله ولكن المواطن المصري له حق، إحنا عندنا مشكلة هنطلع نقوله خلي بالك بكرة لو سمحت عندنا مشكلة كهربا وهيبقي في تخفيف أحمال بكرة بدل ما كانوا ساعة هيبقوا اتنين وبدل ما كانوا اتنين هيبقوا تلاتة وفي بعض الأماكن أكتر من 3 ساعات".

وتابع: "في أماكن الكهرباء اتقطعت فيها مش مرة أكتر من مرة، ناس بيشتكولي كبار سن لهم كل الحق وكل مواطن له كل الحق أقدر أقعد إزاي في الحر الموت ده والله أنا اللي بعتذر، بعتذر عن التأخير في البيان وبعتذر كمان كل مواطن لما بناخد إجراء لازم نقوله وسيادة الرئيس حريص على هذا الامر".

وأوضح: "مجرد ما قلت للمواطن هو إيه اللي قدامه؟ بيتحمل ساعة بس درجات الحرارة هذه الأيام مخيفة جدًا، آلاف الناس بتشتغل في درجات الحرارة 51 وما فيهم واحد قاعد تحت خيمة الناس بتشتغل وبتعمر؛ ولكن بقول حق المواطن تقدير للناس لازم نقول للمواطن لو سمحت خلي بالك".

واختتم: "البيان لما طلع النهاردة طلع متأخر وهذا عتب على الحكومة وأنا بعتب تاني على الحكومة مينفعش أبدًا يطلع بيان بعد الناس ما عرفت لازم أكون ليا السبق أبلغ الناس عشان مصداقيتي".