عاجل| عمرو أديب عن قطع الكهرباء 3 ساعات: "المفروض يطير فيه ناس"

طالب الإعلامي عمرو أديب، بمحاسبة المسؤولين عن تخفيف أحمال الكهرباء لفترة أكبر من المعتاد دون إعلان الأمر للمواطنين بشكل شفاف.

وقال أديب خلال برنامج "الحكاية" المذاع على قناة "أم بي سي مصر": "في ناس بتقولك ما تقلل استهلاك، أنت قاطع النور 3 ساعات عايزني أقلل إيه تاني؟ الصبح بيان ياجماعة في كذا إنما طبعًا متقعدش تقولي ما في موزمبيق أنا مالي؟ أنا بدفع فاتورة كهرباء على فكرة وفواتير الكهرباء لا تنخفض وهتزيد".

وأضاف: "أنا مش طالب شيء عظيم أنا طالب اعتذار يا جماعة حصلنا الطارئ ده النهاردة، وطالع بيان تاني بيقول أن قطع الكهرباء ده هيبقي النهاردة وبكرة بس، أنا بقول لصانع القرار المصري الآن شوفوا الناس دي بتدير الأزمة صح ولا لأ للدولة طرقها أنها تعرف هذه الأزمة بتدار صح ولا لا جايز حد يدير بشكل أفضل".

وتابع: "ناس كتير تعاني حتى الآن أن عندها أجهزة كهربائية كتير باظت، كل ده حطه على جنب وتعالى على اللي حصل النهاردة، اللي حصل النهاردة ده المفروض يطير فيه ناس موظفين ورئيس قسم كذا وكذا دول يترفدوا، إحنا يا جماعة بني أدمين هو اللي بيتعمل فينا ده عادي؟".

وأوضح: "دي الحاجة الوحيدة اللي مش ممكن تبقى سر لما النور بيتقطع الناس بتقول وبقى في إعلام غيرنا في سوشيال ميديا ومواطن قاعد بيكتب من الأسانسير".

وأكمل: "أنت فجأة كل حاجة بتقطع وعايز أقول ده للمسؤولين، النور لما بتتقطع الحياه كلها التليفون بتقطع أن أنا أعمل مكالمة، لا بكلمك على الواي فاي ولا الإنترنت، بيحصل شلل كامل ولما يبقى في قطع للنور 3 ساعات وأنا مسؤول عن اللي بقوله النور اتقطع 3 ساعات في مناطق كتيرة".

وواصل: "بقى واضح دلوقت ليست شركة الكهرباء المسؤولة عن هذا الأمر ولكن المسؤول عن هذا الأمر توافر الوقود ومعروف أن المسؤول وزارة البترول ووزارة المالية عشان مبيدوهاش فلوس".

وذكر: "لا أحد من مجلس الوزراء يريد أن يتكلم في الإعلام ولا أحد من وزارة الكهرباء يريد أن يتكلم في الإعلام كلهم رمولنا البيان وعيشوا".

واختتم: "على فكرة لما تطلع تتكلم هبقى مش لطيف وهسأل أسئلة بايخة، ولكن النهاردة لم يظهر مسؤول النهاردة وبكره وبعده وبعد بعده".