عمرو أديب: الزمالك لو انسحب من مباراة الأهلي هينافس على الهبوط

ناشد الإعلامي عمرو أديب؛ مجلس إدارة نادي الزمالك؛ بخوض مباراة القمة أمام النادي الأهلي بعد أن أعلنت إدارة النادي في وقت سابق رفضها خوض اللقاء.

وقال أديب خلال برنامج "الحكاية" المذاع على قناة "أم بي سي مصر": "السؤال اللي كل المصريين مهتمين بيه الحاجة اللي كل ما تقابل حد يسألك عليها ويقولك يا أستاذ عمرو لو سمحت رد لنا على السؤال ده؛ هو الزمالك هيلعب يوم التلات اللي جاي والا لا دا أهم سؤال وأي أسئلة تانية موجودة بتيجي بعد كده".

وأضاف: "السؤال هل يلعب الزمالك يوم التلات؟ في ناس بتقول طبعا هيلعب وكل دي مناوشات وضغوطات ولكن في النهاية الزمالك هيلعب يوم التلات وفي ناس بتقول لا خلاص مش هتنزل المردي لازم منلعبش الماتش زي ما احنا قررنا".

وتابع: "أنا رأيي ايه؟ أن الزمالك لازم يلعب مينفعش واحنا جوة الدوري تيجي فرقة معجبهاش ماتش أو كورة نطت على الخط وفي مؤجلات أو مفيش نقرر أننا مش هنلعب مفيش حاجة اسمها مش لاعب وبعدين الزمالك مش بيلعب الماتش ده عشان الدوري والكأس الزمالك في المركز الـ 11 يعني مش مثلا خلاص هي النقطة دي بس في بطولة أخرى كل مشجعي الزمالك مستنينها".

وأكمل: "أناشد مجلس إدارة الزمالك لو سمحتوا العبوا يوم التلات الجاي؛ وازاي النهاردة السبت وأنا لاعب في نادي الزمالك مبقاش عارف إذا كان اهم ماتش عندي في الدوري هلعبه والا لا في حين أن الفريق التاني أجيب لك شيكولاته أجبلك بطه عايز استشفاء اجبلك الجمهور يغنيلك؟ أعملك إيه والا إيه في حين ابن الزمالك قاعد حاطط إيده على خده ومش عارف هيلعب يوم التلات ولا لا".

وذكر: "أنت منتظر من اللاعب ده إيه؟ واحد أنت بتقوله مش لاعبين وبعدين فجأة تقوله يلا يا إبراهيم يلا يا محمد عايزين نكسب بكرة الأهلي؛ دا الأهلي احنا مش داخلين نلاعب فرقة تعبانة؛ إيه ياجماعة اللي بيجرا دا دي بطولة".

واختتم: "لما منلعبش أنت كده بتدي التلات نقط دول هدية للأهلي وبتدي الأهلي راحة عشان يقدر يكمل ويقدر ياخد الدوري قدام الفرق المتقدمة ويتخصم منك 3 نقط ونكافح بقي أننا منهبطش دا قرار مسؤول؟ هو اللاعيب نفسيته عاملة ازاي دلوقت؛ احنا مش مكتوب لنا نصرة؟".