إعلامية: عمرو دياب مبيعرفش يتعامل مع الناس والصورة معاه مش "ماية المحاياه" (فيديو)

علقت الإعلامية أميرة بدر، على واقعة صفع المطرب عمرو دياب لشاب حاول التقاط صورة معه خلال احدى حفلات الزفاف.

وقالت بدر خلال برنامج "خلاصة الكلام" المذاع على قناة "النهار": "في معلومات جاتلنا إن هذا الرجل شغال في الفندق وبيشغل عمالة مؤقتة ودي المعلومات الحقيقة اللي عندنا أن الراجل شغال عمالة مؤقتة في الفندق وتوصلنا لدفتر الحضور والانصراف اللي ماضي عليه هو بنفسه وهو ماضي أنه مشي الساعة 8 ونصف باليل".

وأضاف: "الخلاصة على طول أن الفنان الكبير عمرو دياب غلطان جدًا بشكل كبير وتعالوا نقول معلومة تانية عن عمرو دياب، عمرو دياب لا يجيد التعامل مع الناس ومعندوش الفن ده وهو مقل في الظهور وبيطلع يقول يا جماعة أنا بغني بس".

وتابع: "فن التعامل مع الناس عمرو دياب مش شاطر فيه أوي، حاجة تانية معلومة عن عمرو دياب، عمرو دياب مش مطرب شعبوي هو مطرب النخبة بعض الناس مش كل الناس، ممكن يكون واحد زي عصام صاصا أو غيره بيتسمع أكتر في الشارع".

وأوضح: "عمرو دياب مش مطرب الناس كلها ولكن عمرو دياب عند ناس كتير جدًا مننا ذكريات، مفيش مناسبة تفتكرها أو حدث أو سفرية غير أن عمرو دياب هيكون شريك فيها، عمرو دياب شخص ذكي جدًا بدليل أنه قادر يكون على القمة للسنوات دي كلها، ولكن ممكن يكون مش ذكي في التعامل مع الناس".

وأكمل: "حصل كذا موقف لعمرو دياب قبل كده على مدار الفترة اللي فاتت بيتعامل مع الناس بطريقة مش كويسة ففرح من الأفراح كان في حد من مهندسين الصوت بيعمل حاجة تحت، مش حلو أنه اتعامل مع الناس كده، في موقف تاني أتصور له وبيقول للسائق بتاعه فين الكذا بتاعنا وشتمه، أسلوب سخيف مش حلو".

وأوضح: "باين من فترة أن تعاملاته مع الناس مش أحلى حاجة اللي لفت نظرنا أوي في الفيديو بتاع الصفقة هي التلقائية، في تلقائية في الصفعة بدون تفكير، سرعة الضرب دي لو بتدل على حاجة بتدل أن في تلقائية في الضرب وكأنها حاجة عادية".

وذكر: "جبر الخواطر ده مش كل الناس بتعرف تعمله ومش كل الناس بتعرف تجبر بالخاطر، نروح بقي للشاب اللي تم صفعه، أنت غلطان على فكرة لأنك حطيت نفسك في موقف مكانش لازم تتحط فيه، وهو عمرو دياب أو غيره مهياش ماية المحاياة مش لازم أتصور مع عمرو دياب مش هيحييني يعني".

واختتم: "أنت مش معزوم، هننكر حاجة زي كده ولكن دخلت، طيب أنا مش معزوم ونفسي أتصور مع الفنانين فأطلع على الاستيدج اللي فيه عمرو دياب والعريس والعروسة مش أي حد يعرف يعمل ده فأنت طلعت وقمت ماسكه من وسطه عشان يتصور معاك مش كل الناس بتتقبل ده".