شاهد.. مصطفى بكري يحذر من تصدير اليأس والإحباط للمصريين

حذر الإعلامي مصطفى بكري، من تصدير اليأس والإحباط إلى الشعب المصري، مشيرًا إلى أن هناك جهات تعمل على ذلك بشكل مستمر عبر وسائل التواصل الاجتماعي.

وقال بكري، خلال برنامج "حقائق وأسرار" المذاع على قناة "صدى البلد": "الشائعات والأكاذيب لا تتوقف ضد مصر، إحنا شايفين دا بعنينا وبنتابع ده على مواقع التواصل وبعض القنوات المشبوهة الجيوش والطائرات وحتى أسلحة الدمار الشامل لا يمكن أن تهزم شعب، الشيء الوحيد القادر على هزيمة الشعب هو إشاعة اليأس والإحباط".

وأضاف: "أي هزيمة عسكرية أو خسارة اقتصادية أو حتى تعثر سياسي ممكن نعوضه ونعالجه ولكن إزاي تعالج شخص مهزوم من الداخل إزاي تعالج شعب فقد الأمل في المستقبل، إزاي تزرع التفاؤل والوطنية وحب البلد في شباب فقدوا الإحساس بوجودهم وكيانهم في المجتمع ودا اللي بتسعى ليه كل جهة عايزة تدمر هذا البلد".

وتابع: "المسألة مش مسألة حروب عسكرية، المسألة هي هزيمتك أنت من الداخل، إزاي أهزمك وأخلص عليك وأنهي قدرتك على المقاومة، وأخليك تشكك في كل حاجة إزاي أحبطك وأحبط معنوياتك دي كلها خطط واستراتيجيات، مش أنا اللي بقول ده التاريخ والواقع هو اللي بيقول".

وأكمل: "اليابان لما انضربت بقنبلتين نوويتين قاومت وأصبحت قوة اقتصادية عالمية، مقالتش خلاص هستسلم للأمر الواقع، فرنسا اللي تم احتلالها بالكامل قاومت ورجعت قوة اقتصادية وسياسية وعسكرية، الجيوش الألمانية كانت على بعد كيلومترات من الكرملين؛ ولكن روسيا قاومت وانتصرت".

واختتم: "مصر هزمت في 67 ولكن مصر قاومت وخاضت حرب الاستنزاف ووصلت للنصر في 1973 والنهاردة وأنت بتتصفح مواقع التواصل الاجتماعي وبتشوف فيديوهات وبوستات كلها بتصب في اتجاه واحد إزاي أنشر اليأس والإحباط لدى الشعب المصري، إزاي أبرز كل ما هو سلبي وأغطي على كل ما هو إيجابي، إزاي أروج السلبي بالحق والباطل واستخدم أدوات التكنولوجيا والقدرة على الأداء والتمثيل وكل ده بيحصل".