عمرو أديب: رجعنا من غينيا منقوطين وحسام حسن ميعرفش لاعيبته
![الإعلامي عمرو أديب]( /UploadCache/libfiles/20/5/600x338o/735.jpg)
علق الإعلامي عمرو أديب، على تعادل المنتخب الوطني أمام غينيا بيساو، في المباراة التي أقيمت اليوم ضمن تصفيات إفريقيا المؤهلة لكأس العام.
وقال أديب خلال برنامج "الحكاية" المذاع على قناة "إم بي سي مصر": "اللي يقولك إحنا رجعنا بنقطة من غينيا بيساو عنده حق، إحنا رجعنا منقوطين، هذه هي حكاية منتخب مصر تأتي أمام فرق صغير، غينيا بيساو ولا ليها في الموضوع ولا ليها في المعادلة وفجأة يبقى ليه تأثير ونقعد في حسبة برما".
وأضاف: "طبعًا الناس اللي غاوية الهيصة تقولك إحنا خدنا نقطة، اللاعيبة تعبانة جدًا والتغييرات مضطربة جدًا، أنت في أي وقت مرهق قولولي على ماتش واحد سواء للأهلي ولا الزمالك ولا المنتخب كلها اللاعيبة مرهقة اللاعيبة تعبانة اللاعيبة مش قادرة".
وتابع: "مش هو دا اللي إحنا عايزينه لولا الله يباركله محمد صلاح عمل الكورة بتاعته، هو عنده كورة كده بتاعته، يجي من اليمين للشمال ومعاه أربعة خمسة وبرجله الشمال تروح في البعيدة ينجيك ويحييك ويخليك شبه سعيد، هذا المنتخب لا خطة له".
وأوضح: "في لاعيب اسمه ناصر ماهر لو نزل عشر دقائق قبلها كانت اتغيرت الحكاية، لولا بقى صلاح ده اللي هو كنتوا قالبين عليه الدنيا، الـ11 لاعبًا النهاردة مكانوش مديين القوة الكاملة الحاجة اللي تتوقعها منتخب مصر بيلاعب فرقة وتحس أن المنتخب عايز الماتش هادي والكورة بسيطة".
وأكمل: "مدرب المنتخب بتاعنا لازم يعرف لاعيبته وإمكانياتهم، مش في خطة عند المدرب؟ أنا تقديري أنه مفيش خطة ولا حاجة في لاعيبة بتلعب في حتت معينة وبيجيبوا نتيجة، اللاعيبة هي اللي بتلعب يا جماعة".
وواصل: "هل دا مستوى فريق جيد؟ دا السؤال ناس كتير هترد عليا تقول المهم النتيجة هو أنت مين معاك في المجموعة دي؟ دا أنت في مجموعة دعوة الأمهات ولكن غير كده أنت لم تفعل شيء ونحن مستمرين في هذا الأمر بكفاءة اللاعيبة".
واختتم: "اللاعيبة يا جماعة بيوصلوا لمراحل أنه خلاص أنا كده، لو مكانش المدرب يعرفه يعني إيه طعم الفوز، أنا مش عايز أقارنه بحاجات صعبة يعني، إنت خلاص اتعادلت والمدرب منزل لاعيبة تحط الكرة تحت رجلها، أنت متعرفش اللاعيبة بتاعتك يا كابتن حسام؟ ابتدينا نقول كلام بقى وعايزين نلغي الدوري، هتلغي الدوري عشان مين؟ عشان غينيا بيساو وسيرليون وإثيوبيا؟".