عمرو أديب يطالب الحكومة الجديدة بإنشاء جهة لحساب التكاليف العامة لقراراتها

طالب الإعلامي عمرو أديب، الحكومة الجديدة بالاستفادة من الدروس السابقة الناتجة عن القرارات، التي اتخذت خلال السنوات الماضية.

وقال أديب خلال برنامج "الحكاية" المذاع على قناة "إم بي سي مصر": "من الدروس الواضحة أنه نتائج الأشياء ليست بفعل واحد، أنت جيت قلت أنا هقطع الكهرباء عشان بوفر مبلغ كذا أنت في دماغك شايف هوفر المبلغ بقطع الكهرباء".

وأضاف: "ناس قالوا هتوفر مليار دولار وناس قالوا هتوفر تلاته، أنت كنت قاعد تبص بس على الأمر ده، السؤال للوزارة الجديدة لكي تستفيد، لما أنت قطعت النور يا ترى مصانع قد إيه وقفت؟ الناس اللي بتدفع الضرائب هتدفع نفس المبلغ".

وتابع: "وزارة الإسكان من الوزارات الناجحة ووزيرها جيد جدًا ودائمًا مصر كانت محظوظة في وزراء الإسكان كان عندهم فكر يبيعوا الأرض بالدولار والهدف سامي وعظيم فجأة قررت وزارة الإسكان وقف الموضوع لأنه اكتشف كثير من المصريين بيلموا الدولار من جوه ويبعت برة عشان يشتري الأرض بالدولار".

وأوضح: "هنا فكرة الجزر المنعزلة ودا دور رئيس الوزراء الرسمي، رئيس الوزراء شغله هو التنسيق بين الناس دي، في ناس بتاخد قرار القرار ده تأثيره إيه؟ إحنا دولة فيها أزمة طاقة سواء مازوت أو غاز، المشكلة دي بتتحل إزاي؟ فجأة وزارة الكهرباء بتكلمنا أن هناك هدر في الكهرباء في ناس بتسرق الكهرباء والأخبار بتقول إن هناك تغييرات جوة وزارة الكهرباء عشان الهدر في أماكن كثيرة".

وأكمل: "النهاردة في ناس بعتنيلي في أماكن معينة عندهم النور مقطوع لساعات، الخسارة دي بكام؟ المواطن مش مبسوط هل ده كله بيحسب أرجو الوزارة الجديدة يكون فيها شيء ما يحسب التكاليف العامة سواء كانت سياسية أو اقتصادية".

وذكر: "ما نقرأه أن أنت هتواجه عدد كبير من التحديات السنة الجاية دي عندك قرارات لازم تاخدها وفي أسعار هتتغير في حاجات عارفين إنها هتزيد وحاجات لا نعرفها مخلينها مفاجأة، زي ما اتحفنا وزير التموين بعد ما اتكلمنا عن العيش وقالك أنا بفكر في السكر".

واختتم: "الله يكون في عون الوزير في مصر، أنت مش محتاج وزير أنت محتاج سوبر مان، هل الحياة في مصر ستكون سهلة في الـ12 شهر الجايين؟ لا أنت دورك تخلي الحياة أقل صعوبة".