شاهد.. أحمد موسى ينفعل بسبب الدعم: "متعرفش الغلبان آخر مرة جاب فراخ امتى"

طالب الإعلامي أحمد موسى، الحكومة بالنظر إلى تجارب الدول الأخرى الخاصة بالدعم والاستفادة منها، مشيرًا إلى أن الخبز يعد مسألة أمن قومي.

وقال موسى خلال برنامج "على مسؤوليتي" المذاع على قناة "صدى البلد": "ندور على التجارب، مش اختراع ونشوف أنهي تجربة تمشي مع الناس، موضوع العيش عامل مع الناس، عندنا شقين شق بيقول يا جماعة الموضوع عدا وبيعدي وخلاص وشق بيقول العيش بالنسبالي حاجة أساسية، وعندنا حكايتين، ولا أقدر أقول ده بيكره البلد ولا دا بيكره البلد".

وأضاف: "أنا أرجو من الحكومة يعني لازم موضوع الدعم النقدي أو السلعي منجريش فيه، مش لازم أول السنة ياخد وقته شوية ونسمع الناس وننزل القرى ونسأل المواطنين سواء بعمل حوار وطني أو حوار مع المجتمع، أنا عايز قاع المجتمع والمواطن اللي في القرية".

وتابع: "مش عايز المواطن اللي عنده العيش رقم واحد أفقده، أنا عايز أوصل له الدعم لمن يستحق، الدولة تدعم ومستمرة في الدعم ومش هترفع إيدها عن الناس، الدولة مستمرة في الدعم وحريصة على ده، وأنا عايز المواطن يشترك معايا في القرار".

وواصل: "مينفعش أقول أنا هعمل القرار ده بكره لا هعمل القرار ده، عندما أرى الرأي العام المستفيد من الدعم يقولي آه الدعم السلعي يستمر أو النقدي مستمر، وهنا الموضوع محتاج ناخد فيه شوية وقت مش مستعجلين، بمعني أنا بتكلم عن دعم رايح للناس البسطاء، الأغنياء مبيدخدوش حاجة واللي بياخد هو الفقير وهذا الفقير اللي سيادة الرئيس حريص أن الدعم ده يروح لهم لازم شوية بطيء".

وأكمل: "جميع المحافظات لازم تعمل حوار وتجيب الناس من القرى وتجيب العائلات والأسر وهما دول اللي أخد رأيهم، ولو حد النهاردة مش هيبقى عارف الغلبان مشكلته إيه؛ لأنه ميعرفش الغلبان مقعدش معاه وميعرفش ظروفه إيه، في ناس بتقفل الباب ومتعرفش عنده إيه جوه عنده قمح ولا درة ولا كل لحم امتى ولا آخر مرة جاب فراخ امتى متعرفش ده أنا في قرية وأعرف ده".

وكانت الحكومة قد قررت زيادة سعر رغيف الخبز المدعم من 5 قروش إلى 20 قرش بداية من الأول من يونيو الجاري.