عمرو أديب عن إعلان "القسام" أسر جنود إسرائيليين: "كنت سعيد زي الأطفال"

علق الإعلامي عمرو أديب، على إعلان كتائب القسام أسر جنود إسرائيليين خلال عملية مركبة في مخيم جباليا شمالي قطاع غزة.

وقال أديب، خلال برنامج "الحكاية" المذاع على قناة "إم بي سي مصر": "الواحد بيشعر بسعادة لأي إنجاز للمقاومة، قول زي مانت عايز على حماس والقسام، أنا مش عارف غير أتعاطف مع المقاومة، إمبارح كنت سعيد زي الأطفال وبقي عندي رغبة إن يكون الخبر صحيحًا، وأي انتصار بتعمله المقاومة أفرح بيه".

وأضاف: "مش عارف أفرح بالقضاء على المقاومة، حضراتكم تعرفوا مشكلتي مع الإخوان ولكن في النهاية مش عارف أتعاطف غير مع المقاومة، ومش عارف أقول إن هما غلطوا وبوظوا الدنيا أنا بشوف الشاب اللي بيحط القنابل ويضربها كنت ببقى فرحان بيه".

وتابع: "إحنا شوفنا الويل واتقتل من عندنا منهم آلاف واقتصادنا باظ بسببهم، سنين ورا سنين والمدارس اللي كانت بتنضرب في بحر البقر والمصانع اللي كانت بتنضرب، مش عارف غير أتعاطف مع المقاومة أعمل إيه يعني؟".

وواصل: "أما بلاقي الشباب دول بالإمكانيات البسيطة دي إحنا بقالنا 8 شهور، كانوا بيقولوا السنوار هيتجاب بعد أسبوع، مين دول موقفين حياتهم بس عشان يعملوا كده الناس، دي عندها قضية أنت عايز تقولي الناس دي عندها أي مقابل غير أن عندها قضية في بلدها".

وأوضح: "يقولك أنت عارف اللي حصل في 7 أكتوبر؟، طيب أنت عارف إيه اللي حصل في 1967، أنتوا عارفين اللي حصل في 1956، أنتوا عارفين المجازر اللي بيتعرض ليها الفلسطينيين؟، العملية بتاعت إمبارح دي سواء صح أو غلط عملت زلزال ورجة كبيرة".