أحمد موسى: عندنا تحديات أكبر من قطع الكهرباء ولازم نتحمل بلدنا

أكد الإعلامي أحمد موسى، أن الدولة تواجه تحديات أكبر كثيرًا من انقطاع التيار الكهربائي، نتيجة تخفيف الأحمال، مشيرًا إلى أن على الجميع تحمل الظروف الحالية.

وقال موسى برنامج "على مسؤوليتي" المذاع على قناة "صدى البلد": "وأنا جاي النهاردة كنت في مكان، يعني ساعتين ونص من هنا في درجة حرارة أكتر من 40-45 في قلب الصحراء وبعد ما خلصنا لقيت مشاهدين كرام بيقولولي بص على الكهرباء وبص على وعلى، المواطن له حق، معندوش الصورة الكاملة للأسف، ومش كل ما يعرف يقال".

وأضاف: "عندنا تحديات أهم من الكهرباء، أيوه عندنا تحديات أهم من الكهرباء، مع تقديري للجميع حضرتك عندك رجالة قاعدين وسط الصحراء درجة حرارة 45-47 عشان يحموا ويأمنوا مشتكاش واقفين زي الأسود بكلمك على قلب الصحراء".

وتابع: "لازم نتحمل بلدنا ونتحمل الظروف شوية، الظروف على الجميع في أزمة عندنا أه عندنا أزمة، عندي أزمة كهرباء أه طبعا ومزعلة الناس أه طبعا مبقولش لا ولكن بديلك مثال واحد بس مش هتكلم على تفاصيل دلوقت، ناس واقفة في درجة حرارة 45-47 في قلب الصحراء".

وتابع: "ويقولك اطمنوا على بلدكم واطمنوا على جيشكم محدش قال إن أنا تعبان وأن أنا حران، قالك أنا مسؤول دوري ومكاني هنا عشان أحمي البلد وأحمي الشعب ومحدش يهوب لحدودنا، تقول إيه إلا الدعاء لهم ربنا يحميهم".

وأوضح: "نخلي بالنا شوية البلد محتاجة لكل واحد فينا والدولة لو عندها مش هتبخل والله، الظروف صعبة والتحديات شديدة من ساعة ما بدأت بحاول بقدر الإمكان أشرح لحضراتكم حكاية بلد أو جزء من حكاية بلد أو جزء من تحديات بتواجهنا وضغوط بنتعرض ليها".

وواصل: "ناخد بالنا كويس أوي اليومين دول، اليومين دول معندناش أي حاجة إلا البلد، هنعدي من المرحلة والصعوبات باذن الله وترجع الكهرباء أفضل مما كانت، ومحدش عايز يتقطع الكهرباء والجو نار ولكن عايزك تاخد بالك البلد قدامها إيه وتحدياتها إيه".

وبدأت الدولة خطة لتخفيف التيار الكهربائي منذ عدة أشهر بسبب أزمة النقد الأجنبي وتأثيرها على استيراد الوقود اللازمة لتشغيل محطات الطاقة.