مصطفى بكري يحذر من مؤامرة: "كلهم في خندق واحد ضدنا"

أكد الإعلامي مصطفى بكري، أن الشعب المصري واعٍ، مشيرًا إلى أنه لا يمكن أن ينجرف خلف من يروجون الأكاذيب لأهداف تخدم أخرين.

وقال بكري خلال برنامج "حقائق وأسرار" المذاع على قناة "صدى البلد": "عارف أن الحمل تقيل وعارف أن الظروف الاقتصادية مش ولابد والاسعار لسه منزلتش زي ما إحنا عايزين ولكن لو معاك ملايين الدنيا كلها تفيدك بإيه لو بلدك تعرضت للخطر لو لديك في كل بلد قصر تساوي ايه قدام ذرة من تراب مصر".

وأضاف: "كلنا النهاردة نموت في مواجهة أي خطر في ساعة الجد ووقت الحسم بنلم على بعض، بننسى كل الأوجاع ونغمض عنينا ومنشوفش إلا بلدنا، بلدنا اللي من 7 آلاف سنة صامدة بأرضها وناسها وحدودها، رغم كل المؤامرات والمكائد إلا أن عمرها ما انهارت بفضل ولادها الطيبين وجيشها العظيم اللي أتاسس منذ 3200 سنة قبل الميلاد، اللحظة دي أنا شايف المؤامرة وشايف الاستهداف واللعب من كل اتجاه؛ مؤامرات من الخارج وخونة محسوبيين عليها بيروجوا تحت عناوين وطنية وحديث عن الإنسانية".

وتابع: "كلهم في خندق واحد ضدنا وبيتكلموا ضد بلدنا ولكن لازم تعرفوا أن القائد اللي بيحكم صحيح أنه هدف للأكاذيب والادعاءات وتزيف الحقائق، ولكن الرجل اللي انتصر لنا في 3 يونيو اللي وقف وقال يا مصريين إحنا بنتحمل الضربة بالنيابة عنكم واللي ضحى بكل حاجة ووقف في عز اللحظة الحاسمة، مازال واقفًا وصامدًا، وما زال يرفع علم مصر في كل مجالات الحياة ولسه عنده أمل أن إحنا هنبقى قد الدنيا بوحدتكم واصطفافكم الوطني".

وأوضح: "أوعوا تفتكروا إن ده كلام إنشا ولا كلام بيتقال اعتباطا دا واقع بنعيشه ومؤامرة لو شفتوها وشفتوا أبعادها وانتوا بتشوفوا ملامحها الآن كل واحد فيكم هيطلع في الشارع ويمسك في تراب بلده ويقول أنا عمري ما أفرط".

واختتم: "كل واحد هيمد إيده في إيد جيش بلده ويقول أنا معاك وأنا جندي احتياطي كل واحد هيمد إيده لشرطته ويقولها أنا في ضهرك إحنا الشعب العظيم اللي بيستدعي بالضمر الوطني، تمشي في الشوارع تلاقي الناس بتقول الحق يا عم إيه وإيه ودا حق الناس دا طبيعي مش هتقدر تقول للناس متشتكيش ولكن افتكروا 56 و67 و6 أكتوبر 73 افتكروا 30 يونيو الشعب دا خرج واتحدى".