شاهد.. تامر أمين ينتقد تصريحات حسام حسن: "غير موفقة"

انتقد الإعلامي تامر أمين، تصريحات حسام حسن، المدير الفني للمنتخب الوطني، والتي أدلى بها خلال المؤتمر الصحفي الأخير.

أسطورة

وقال أمين، خلال برنامج "آخر النهار" المذاع على قناة "النهار": "كابتن حسام حسن، حضراتكم عارفين الأسطورة كابتن حسام حسن هو المدير الفني لمنتخب مصر لكرة القدم، ومنتخب مصر مقبل الشهر القادم على مباراتين واحدة منهم حاسمة ومصيرية في مشوار تأهل مصر لكأس العالم القادمة".

وأضاف: "إحنا ماشيين كويس أوي ومتصدرين وعندنا ماتشين مع بوركينا فاسو وغينيا، القصة كلها في ماتش بوركينا فاسو اللي هناك؛ لأن بعد كده في ماتش عودة، أنا قلت في بداية التصفيات سيبكم من المجموعة ومن كل مبارياتها، هي مباراة واحدة تحسم القصة لأن بوركينا فاسو هي المنافس المباشر لمصر وهي أقوى فرقة في المجموعة بعد مصر".

وتابع: "لو استطعت تجنب الخسارة في ماتش بوركينا فاسو فإن 90% صعدت إلى نهائيات كأس العالم، مبقاش في تلعب تصنيف أول أو تاني خلاص، المهدد الأساسي ليك بوركينا فاسو خصوصًا المباراة اللي هناك ولو اتعادلت بس مبروك ولو كسبت مبروكين ولكن تخسر دي مشكلة".

المؤتمر الصحفي

وواصل: "المنتخب مقبل على أهم ماتش في مشوار التصفيات المؤهلة لكأس العالم، اللي هنا طبعًا مهم لأنه المنافس المباشر ولكن الأهم الماتش اللي هناك، والمهم إنك تكسب هنا ومتخسرش هناك".

وأوضح: "المشكلة بقى فين؟، المشكلة في المؤتمر الصحفي اللي عمله حسام حسن النهاردة، في رأيي أن أضعف وأهذب نقد أقدر أقوله النهاردة أن كل الكلام اللي قاله في المؤتمر الصحفي النهاردة غير موفق فيه تمامًا، ليه بقي كان غير موفق، في فرق بين أن أقول الحقيقة دب، وإني أعرف امتى أقول إيه وإزاي".

وأكمل: "النهاردة حسام حسن طلع فتح النار على كل حاجة، قالك الدوري المصري ضعيف، ومش لاقيين فيه كورة، ومش لاقيين لاعيبة جديدة نضمها للمنتخب، قالك لاعيبة مصر يفتقدون المهارة الأساسية في كرة القدم، لا بيعرفوا يسلموا ولا يستلموا".

واختتم: "بعيدًا عن اتفاقي أنا مع جزء من اللي قاله حسام حسن، جزء من اللي قاله صحيح فيما يتعلق بالدوري وفي لاعيبة كتيرة بتلعب كورة ومبتعرفش لا تسلم ولا تستلم، أنا تامر أمين أقول كده، إعلامي بيقول كلمتين يتسمعوا أو لأ، لكن أنت يا حسام المدير الفني للاعيبة دي".