عمرو أديب: استهلاك الغاز زاد.. وانقطاع الكهرباء هيستمر

أكد الإعلامي عمرو أديب، على تغيير مواعيد جدول تخفيف أحمال الكهرباء ليبدأ من الثالثة عصرًا وحتى السابعة مساء.

انقطاع الكهرباء

وقال أديب، خلال برنامج "الحكاية" المذاع على قناة "إم بي سي مصر": "ابتدا يبقى في تغيير من الوردية الصباحية، وبقت في وردية بعد الضهر من الساعة 3-7، والنور بيقطع في الفترة دي، وحضراتكم عارفين من 3-7 مبيبقاش في حاجة مبيبقاش في حاجة مهمة في مصر بتجرى، الطلبة راجعين من المدارس والموظفين راجعين من المدارس، والناس بتبقى محتاجة الأسنسيرات عشان مش كل مصر عايشة في كومباوندات".

وأضاف: "القرار دا اتاخد لأنه اتقال علشان الامتحانات وأن المدارس محتاجة كهربا ومحتاجة نور، بين قوسين عايز أقولكم إن الأرقام بتقول في ضغط على محطات الكهرباء وفي استهلاك أعلى للغاز، بالهدوء كده من غير ما أكون خبير في الغاز طبعًا مصر محتاجة استهلاك غاز أكبر، وبالتالي ليس هناك أمل في الكام أسبوع الجايين دول أن موضوع الكهربا ده يخلص".

استهلاك الغاز

وتابع: "زي ما بقول لحضراتكم، الضغط أزيد والاستهلاك أكتر، ارتفاع استهلاك مصر من الغاز الطبيعي إلى 6.1 مليار قدم مكعب خلال مايو، هذا الأمر بيخلي الدنيا صعبة شوية على اتخاذ قرار أن هما ميقطعوش النور".

وأوضح: "النور هيفضل يتقطع الفترة اللي جاية، أنا آسف والله أنا بزعل والناس بتضايق، أنا بقولكم الحقيقة والحقيقة دايمًا مش دمها خفيف، ودا الواقع اللي إحنا فيه ودي الحاجة اللي ظروفنا بتسمح بيه دلوقت، في بقى أعراض جانبية أخرى بيبقى في سياح في معابد، ويتقطع عليها النور، في ناس تقولك وإحنا مالنا يعني هي جات على السياحة والمعابد ما يقطع عليهم النور ولكن المسألة دي دمها مش خفيف خصوصًا أن السائح اللي جاي ملوش دعوة بتخفيف الأحمال".