عمرو أديب: اللي شمتان في المقاومة الفلسطينية.. استفدت إيه؟

عبر الإعلامي عمرو أديب، عن استيائه من قيام البعض بالتقليل من احتلال إسرائيل لمعبر رفح ومطالبة الدولة المصرية بالابتعاد عن الأمر بداعي أنها أراضي ليست مصرية.

حدود مصر

وقال أديب، خلال برنامج "الحكاية" المذاع على قناة "إم بي سي مصر": "الحتة دي زي أرضنا التخوم دي بتأثر عليك، والأتراك فاهمين الحاجات دي كويس والأمريكان فاهمين الحكاية دي كويس يعني إيه مناطق قريبة منك تهدد أمنك اللي عاملة ده تهديد وتحدي طبعًا والمواقف اللي المصريين عملوها في العلن ومش في العلن واللي عرفناها من الإعلام الإسرائيلي".

وأضاف: "موضوع غزة ده مش بمزاجنا، أنت مرتبط بموضوع غزة دة لآخر العمر ولا تقدر تسيبه لمليون سنة، أنا قلتلكم دايمًا المشكلة في مصر أنت هتبقى جزء من الحل وإلا جزء من المشكلة مصر اليومين اللي فاتوا كانت جزء من المشكلة".

وتابع: "بقولك إن الإدارة المصرية نفسها تحدثت عن تحديد الأمن القومي المصري فتيجي تقولي لا أصل الحتة دي مش أرضنا، لا".

وأكمل: "أنا جيشي أصلي مخليه، مخليه لإيه؟ أنا مش عايزك تحارب أنا مش عايزك تبان ضعيف كده أنت مصر الإسرائيلي ميعرفش حد هنا غيرك، الـ100 سنة اللي فاتت محدش يقدر يقول غير مصر، والغضب المصري والضيق المصري وقدام شعبه الضامن الوحيد أنه عنده سلام مع مصر".

وأوضح: "أهم دولة موجودة في المنطقة على حدوده عنده معاها اتفاقية سلام، أنا بكلم الشعب أنا بكلم الرأي العام أرجوكم متبيعوناش رخيص".

سخرية من المقاومة

وذكر: "لو أنت مغضبتش أنك شفت الدبابة على المعبر وعليها العلم الإسرائيلي يبقى في حاجات كتير اتغيرت جوانا، يا جماعة أنتوا مع مين؟ أنا ساعات بستغرب، هما دول الشباب الصغيرين دول اللي بيقولك بوظوا الدنيا وبتاع، هو اللي حصل في الأمم المتحدة النهاردة حصل ليه؟".

وواصل: "اللي كان قاعد يتندر وشمتان في المقاومة أنت كسبان إيه؟، أنت لازم تفكروا أنتوا عايزين إيه؟ وبعدين فكرة النأي بالذات دي مش كل حاجة تبقى صح في وقتها مش أنك تكون في حرب على طول يبقي صح أو أن تكون في سلام على طول".

واختتم: "نتنياهو وصل في مرحلة مع الأمريكي قاله على فكرة أنا ممكن أقف لوحدي، نتنياهو قال لبايدن مش عايز الذخيرة بتاعتك، وأنت هنا في مصر، بعض الناس يقولك إحنا مالنا خلينا نشوف الفراخ البانية بكام، الموقف المصري غاضب، كن سندا".