إبراهيم عيسى: إحنا مستلفين من طوب الأرض.. بتستقبل 9 ملايين لاجئ ليه؟ (فيديو)
أكد الإعلامي إبراهيم عيسى، أن هناك انزعاجًا شديدًا من المواطنين المصريين من قضية اللاجئين، مشيرًا إلى أن الدولة لا تحتمل استقبال الأعداد الموجودة.
انزعاج مصري
وقال عيسى، خلال برنامج "حديث القاهرة" المذاع على قناة "القاهرة والناس": "في انزعاج مصري واضح لا يمكن أن تخطئه عين أو تصم عنه أذن من اتساع ظاهرة اللاجئين العرب في مصر، وهي ظاهرة لم تعد محلًا للنقاش، بل أصبحت محلًا للغضب والاحتجاج والاندهاش والاستغراب والتساؤل".
وأضاف: "مصر مازالت وستظل قلبًا مفتوحًا لكل المواطنين العرب وكل الشعوب العربية ولم تغلق بابها أبدًا عن أي لاجئ أو من يستجير بها، ولكن دا بيتعمل بالعقل والدستور والقانون ويتعمل كمان بالتشارك الشعبي والقبول معني، هل نحن دولة قادرة اقتصاديًا على استقبال 9 ملايين لاجئ طبقًا لكلام الحكومة بيتكلفوا 10 مليارات دولار؟".
وتابع: "هل إحنا دولة قادرة اقتصادية على استيعاب هذا العدد من اللاجئين، اللاجئون دول بيدخلوا مصر بشكل شرعي من الموانئ البحرية والبرية والجوية وهما مبيدخلوش غصب عننا، بناء على إيه فاتحين على البحري الحكاية دي، إحنا دولة قادرة اقتصاديًا؟، لا إحنا مش دولة قادرة اقتصاديًا، إحنا دولة متدهورة اقتصاديًا بدليل أنه الحكومة نفسها على لسان رئيسها أو متحدثها بيقول إن أوروبا لازم تتحمل الكلفة بتاعة اللاجئين، من جبرنا على أننا نستقبل اللاجئين بالمنظر ده".
لماذا؟
وواصل: "أهلا وسهلًا باللي جاي بعقد عمل او استثمار أو بيشتري عقار أو أرض أو اللي جاي سياحة أهلًا وسهلًا طبعًا بيته، إنما ناس داخلة جهجاهون كده، أصل هي مضطرة نتيجة الظروف في بلادها، طيب وبعدين هو أنا مستعد، طيب متروح للدول القادرة، اشمعنى الدول القادرة اقتصاديًا وسكانيًا على استيعاب الملايين مستقبلتش 5 أنفار وأنت بتستقبل 9 ملايين ليه؟ ماهي مش جدعنة".
واختتم: "لما استقبل فوق طاقتي هتنفجر طاقتي وهفقد أي قدرة على مساندة من يريد السند، قولوا للناس يا جماعة انتوا مستقبلين 10 ملايين ليه والا 9 مليون، ومتكلفين 10 مليارات هو إحنا بنلاقي الفلوس دي؟، إحنا مستلفين من طوب الأرض ومثقلين بـ165 مليار دولار، إذا كان الرقم دقيق أكثر أو أقل من كده شوية، وعلينا استحقاقات ديون بالعمى، طيب أشقانا واخواتنا دول أجبلهم منين؟، اشمعني إحنا بنقول للمصريين نجبلكم منين، ومبنقولش لملايين العرب اللي جايين نجلبكم منين".
