أحمد موسى يعلق على ارتفاع أسعار الفسيخ: "الكيلو وصل 70 جنيه"

علق الإعلامي احمد موسى على ارتفاع أسعار الفسيخ والرنجة في ظل ارتفاع الأسعار مع حلول شم النسيم الذي يحتفل به المصريين الاثنين المقبل.

وقال موسى خلال برنامج "على مسؤوليتي" المذاع على قناة "صدى البلد": "عايز أقولكم الأسعار؛ أسعار الفسيخ؛ تبدأ بـ 400 جنيه؛ الملوحة بـ 280 جنيه والرنجة الممتازة بسعر 160 والرنجة اللوكس بسعر 200 جنيه".

وأضاف: "في فسيخ بـ 500 جنيه وبعض المحلات المعروفة وصل سعر كيلو الفسيخ 700 جنيه؛ طبعا الناس هتقولك الأسعار والغلاء وأسعار السمك غالي ولكن أيام جميلة والناس بتحتفل وتنبسط".

وتابع: "مصر اشغال كامل وكله بيستعد لهذا اليوم؛ احنا اليوم ده مكناش بننام وكنا نقعد سهرانين نتفرج على الحفلات وكان عبد الحليم أو وردة ثم باقي الفنانين؛ كنا نسمع حفلة عيد الربيع ونقعد نجهز بكره رايحين نلعب كورة على النيل وتجيلك الفرق من القرى اللي حوالينا وكان بيبقي يوم رائع جدا".

وواصل: "الأيام دي موجودة لأن البلد الحمد لله النهاردة؛ عندك كل مكان لو انت عايز تروح عين الصيرة روحوا احتفلوا؛ الجناين هناك معمولة احتفلوا وانبسطو؛ عايزين تروحوا اسكندرية او حدائق القناطر وممشي أهل مصر عاملين حفلات هناك؛ الناس بتحب تقعد على النيل".

وأوضح: "السياحة العربية كمان واشقائنا والسياحة الأجنبية والمصريين والفنادق مليانة كلها؛ وكل الفنادق الصبح فطار وغدا تلاقي الصبح الرنجة والفسيخ والضهر كمان وتلاقي البيض والألوان والحاجات اللطيفة دي".

واختتم: "حتى الواحد يقولك أخد لو حتى نص كيلو وأهو يوم وبيتقضى ويبقي اجمل يوم في الدنيا بس خلوا بالكم من صحتكم".