شاهد.. أحمد موسى يكشف الأهداف الأمريكية من إنشاء الرصيف العائم على سواحل غزة

أكد الإعلامي أحمد موسى، أن الغرض من بناء الولايات المتحدة للميناء العائم على سواحل غزة ليس نقل المساعدات الإنسانية إلى سكان قطاع غزة.

الأهداف الأمريكية من إنشاء الرصيف العائم

وقال موسى، خلال برنامج "على مسؤوليتي" المذاع على قناة "صدى البلد": "التواجد الأمريكي في غزة تواجد للجيش الأمريكي، عاملين قاعدة عسكرية مش رصيف، إحنا من بدري شايفين الحكاية ولما يجي الأمريكان يقولوا هيخدوا فلسطينيين كلاجئين في الولايات المتحدة الأمريكية دا معناه إنك تفرغ القضية".

وأضاف: "أمريكا النهاردة غيرت سياسياتها؟ أمريكا طول عمرها بتقول لا أنا ضد هذا الأمر، يبقى أنت بتريح نتنياهو وعايز تفرغ قطاع غزة من الشعب الفلسطيني بمنحهم اللجوء في الولايات المتحدة، طبعًا هيروح أمريكا خلاص".

وتابع: "أمنية حياة نتنياهو إن الأمريكان يعملوا كده، أمريكا بتعمل ده بالاتفاق مع إسرائيل، بلينكن معترضش وقالك عايزين خطة واضحة لحماية المدنيين في رفح، ولكن مقالش إحنا رافضين رفضًا قاطعًا، قالك عايزين خطة واضحة قبل الهجوم على رفح".

وواصل: "هو مش ضد الهجوم على رفح، ولكن عايز يعرف الخطة من أجل الهدف ده، توطين الفلسطينين في أمريكا، إحنا في موقف مصر واضح من الأول رافض تمامًا لأن الأول كانوا عايزين مصر، الرئيس وقف واتكلم وحط خط آحمر وخلاص مبقاش في مخلوق في العالم يقدر يتكلم على مصر".

الجيش الأمريكي موجود على الأرض

وأوضح: "نعمل إيه يحلوا الموضوع لإسرائيل إزاي؟ لما ييجي يقول أوطن الفلسطينين في أمريكا يبقى أنت بتضيع القضية الفلسطينية، اتكلمنا في الموضوع ده من شهرين الميناء دا رصيف ولا قاعدة عسكرية؟، الأمريكان كشفوا عنه والجيش الأمريكي على الأرض، عارفين الأمريكان بيفكروا إزاي وكانوا بيقولوا مش هنبقى موجودين على الأرض".

وذكر: "الجيش الأمريكي موجود على الأرض هو اللي بيبني ويجهز، هذه قاعدة ومش رصيف دا متكلف 400 مليون دولار، قاعدة عسكرية فيها كل شيء أمن وتأمين وسلامة ولها عدة أهداف أنت بتقفل منطقة ساحل غزة بالكامل، خلاص خدت الحكاية من أولها لآخرها، والأمريكان بيحطوا رجليهم في حتة مبيمشوش منها".

وشرعت الولايات المتحدة خلال الفترة الماضية في إنشاء رصيف عائم على سواحل قطاع غزة بالقرب من محور نتساريم الذي أنشأه الاحتلال الإسرائيلي لتقسيم قطاع غزة.