عمرو أديب ينتقد الإيحاءات غير الأخلاقية من اللاعبين: "إيه أهميتها؟"
انتقد الإعلامي عمرو أديب، قيام بعض اللاعبين بإيحاءات غير أخلاقية بعد تسجيل الأهداف، مشيرًا إلى أن مثل هذه التصرفات ليس لها فائدة وتستلزم العقاب من مسؤولي كرة القدم في مصر، خاصة وأن اللاعبين يعتبرون قدوة للشباب.
الايحاءات اللا أخلاقية
وقال أديب، خلال برنامج "الحكاية" المذاع على قناة "أم بي سي مصر": "أنا مش فاهم ليه الإيحاءات اللا أخلاقية اللي بقت بتتعمل بعد الفوز بأي مباراة، إن أنت تكسب وتهيص وتتنطط وترقص وتغني سطلانة وكل حاجة، ليه بقي فيه لاعيبة دلوقتي، أنا مبتكلمش عن الأهلي بس أو الزمالك بس أنا بتكلم عن الجميع".
وأضاف: "ليه بقى في نوع من الحركات اللا أخلاقية للتعبير عن الفوز، إيه أهميتها يعني؟ لا هي مثلًا شبه حاجة بره، ولا هي حاجة تدل أنه كان متعصب وربنا كرمه، لأ مفيش أي حاجة من دي أنت كسبان ومبسوط ومفيش مشاكل وفجأة تلاقي حركة خارجة جدًا عن الأدب".
وتابع: "ياجماعة آه انتوا شباب ولاعيبة كورة وبتاع بس أنت مثل، يعني أنت لما مثلًا شاب صغير يشوفك كده ويبقى واقف في الملعب يروح شادد الشورت بتاعه، أو يعمل حركة بإيده في المدرسة بكرة عشان يقلد حضرتك".
مطالب بالمعاقبة
وواصل أديب: "أنت بتعتبر نفسك حر طلق، أنت مربي أنت نموذج أنت شخص عليك مسؤولية، أرجو بس أنه حاجتين، اللاعيبة تعرف أنها تفرح زي ما هي عايزه، ولكن ليس بهذا الشكل الشاذ، الحاجة التانية أنه الجهات المعنية في مصر تعاقب أنا بتكلم عن الأهلي والزمالك وبيراميدز وفيوتشر وكل الأندية".
وأوضح: "أما يكون في عقاب واضح اللاعيب ياخد باله، أنا معنديش أي مانع أتنطط وأرقص وأتشقلب إنما حركات خارجة قدام الملايين دا شيء المفروض لا يتم السماح به أبدا".
وأثار رد فعل لاعب الزمالك مصطفى شلبي أثناء احتفاله بالهدف الثالث لفريقه أمام نادي دريمز في إياب نصف نهائي الكونفدرالية، ردود أفعال غاضبة ضد اللاعب، بسبب الحركة المسيئة للاعب أمام الجماهير.
وخلع شلبي قميص الفريق بعد إحرازه الهدف الثالث لفريقه في المباراة ثم توجه إلى الجماهير بحركة فسرت على أنها غير أخلاقية.
