شاهد.. خيري رمضان يوجه رسالة إلى رضا عبد العال "الكونغولي"
انتقد الإعلامي خيري رمضان، تصريحات رضا عبد العال لاعب المنتخب الوطني السابق، والتي انتقد فيها حكم مباراة الأهلي ومازيمبي الكونغولي في إياب نصف نهائي دوري أبطال إفريقيا.
رضا عبد العال الكونغولي
وقال رمضان، خلال برنامج "مع خيري" المذاع على قناة "المحور": "رضا عبد العال الكونغولي طلع بعد المباراة على القناة بتاعته وكان زعلان من الحكم والفار وبيتهم المخرج وبيقول معروف انتمائه، رضا عبد العال المصري دا كان لاعب كرة عظيم وراجل طيب جدًا وأنا بحبه سواء كان في الزمالك أو الأهلي".
وأضاف: "رضا الكونغولي بيكدب؛ لأن لاعيبة الأهلي اعترضوا ولا الجمهور اعترض ولا إحنا وإحنا بنتفرج اعترضَا، رضا عبد العال قال المخرج معروف انتمائه ويقصد الأستاذ محمد نصر، وقال معروف انتمائه لأنه في الكونغو طبعًا لازم يشككوا في كل حاجة".
وتابع: "عايز أقول لكابتن رضا عبد العال الكونغولي لو كانت المسالة نقدًا رياضيًا لقبلنا ما تقول ولكن إذا كانت كراهية أو بحثا عن تريند فلن يكون لك تاريخ في الكونغو، كابتن رضا عبد العال المصري لما يطلع طبيعي هيفرح أن فريق مصري فاز".
وواصل: "الكابتن رضا عبد العال المصري كل الحكام طلعوا قالوا الكرة لمسة يد وحيوا الست اللي قاعدة في الفار اللي شافت الكرة، اللي مش فاهمه الكابتن رضا عبد العال الكونغولي أن الفار ليس للمخرج سيطرة عليه، المخرج غلط أنه مخلناش نشوف الهاند ومعدهاش أبدًا".
وأوضح رمضان: "المخرج ملوش علاقة الكاميرات متوصلة على الفار مباشرة، التقنية بتقول إن إنت منعزل تمامًا، والست شافتها هاند بول والحكم حسبها جول، وفي القانون يا كابتن رضا يا كونغولي الحكم ميروحش للفار لما الكورة تبقى أوفاسيد؛ لأن الفار بيعمل خطوط ويقوله".
وذكر: "أما لما يبقى في كارت أحمر يستحقه لاعب أو لا يستحقه أو ضربة جزاء أو هدف الفار شايفه كده بيقول للحكم تعالى شوف بنفسك وقرر نبقى رأيين".
واختتم: "المخرج كمان كان أستاذ هشام عبد الودود مش الأستاذ محمد نصر هو كان بيتكلم واللغة الكونغولية صعبة، وهو كان فاهم أن الكلام مش هيوصل للمصريين، أنت بتخاطب مين يا كابتن رضا، إنت بتكره الأهلي إلى هذا الحد؟ إنت خدت كام بطولة مع الزمالك وكام بطولة مع الأهلي، طيب جمهور الأهلي بيتطاول عليك اوكي، خليك موضوعي وخليك مصري قول برافو لفرقة لعبت كويس".
