مصطفى بكري: "عايزين مسؤولين يحسوا بالشعب.. وأخطر حاجة الناس تبقى محبطة"

طالب الإعلامي مصطفى بكري، بإجراء تغييرات بين المسؤولين الذين يعرقلون حركة الاستثمار، مشيرًا إلى أنه يجب أن يكون هناك مسؤولين يعرفون مشاكل الناس ويقومون بالعمل على حلها ويشعرون بالآم المواطنين في ظل الظروف الحالية.

أحوال الناس

وقال بكري، خلال برنامج "حقائق وأسرار" المذاع على قناة "صدى البلد": "المطلوب مسؤولين يشوفوا مشاكل الناس يتابعوا أحوال الناس، الناس يا سادة عايزين مسؤولين على قدر المسؤولية، يحسوا بيهم يحسوا بالشعب، عايزين المسؤولين يشوفوا الأخطاء اللي بتسبب عرقلة لحركة الاستثمار رغم الجهود اللي يبذلها السيد الرئيس".

وأضاف: "حتى ما حدث في رأس الحكمة كان بجهد السيد الرئيس بالأساس، الشعب المصري عنده تفاؤل بالمرحلة الجديدة من منطلق ثقته في السيد الرئيس، ولكن يتمنى من كل الجهات الحكومية أنها تراعي مطالبهم، موضوع أحمال الكهرباء بيألم الناس، موضوع الأسعار رغم جهود مجلس الوزراء مازالت الأسعار مشكلة كبيرة".

زيادات في الأجور

وتابع: "يمكن حاصلة زيادات في الأجور وصلت 575 مليار جنيه مقابل 494، الدعم وصل إلى 635.9 في مقابل 532.8 وغيره وغيره، ولكن في نفس الوقت الناس الحقيقة مازالت تعاني في مثل هذا الظرف الناس محتاجة للأمل، الناس بتدي الناس ثقة في إمكانية التغيير نحو المستقبل، الشعب المصري صبور وعنده حرص على بلده وعلى استقرار بلده ولكن متسبوش الشعب عرضة للشائعات والأكاذيب وتصدير الإحباط واليأس".

وواصل بكري: "أخطر حاجة إن الناس تبقى محبطة ييجي ينتظر كذا ميلاقيهوش، بلاش نحط إيدينا في الماية الباردة، البلد محتاجة لإجراءات عاجلة وسريعة تساعد الرئيس في تنفيذ برنامجه الطموح اللي بيسعى لتحقيقه في أقرب وقت ممكن، الشعب ده اتحمل كتير جدًا، ولكن أنا عايز أسال ليه غيرنا بينجح وإحنا مش عارفين ننجح في مجال الاستثمار لغاية دلوقتي، هل يعقل أن 70% من الموازنة العامة ضرائب؟ فين الصناعة فين الزراعة إحنا عايزين ننهض ببلدنا".

وذكر: "إحنا عملنا بنية تحتية كبيرة عملنا شغل لا ينكر وشيء بذل فيه مجهود وكل ده استعداد للمستقبل عايزين نجني الثمار بقى عايزين الغلبان يحس إنه يقدر يروح يشتري كيلو لحمة إن شاء الله مرة واحدة في الشهر".