شاهد.. تامر أمين يعرض تسجيلا صوتيا لتاجر أسماك يطالب زملائه بتثبيت الأسعار

أشاد الإعلامي تامر أمين، بحملة مقاطعة أهالي بورسعيد للأسماك التي ارتفعت أسعارها بشكل غير مسبوق، مشيرًا إلى أن الحملة نجحت خلال 48 ساعة.

المقاطعة الشعبية

وقال أمين، خلال برنامج "آخر النهار": "فكرة المقاطعة الشعبية، إحنا قولنا كتير يا جماعة في أزمات اقتصادية ومشاكل ولكن هناك مغالاة وتربح من بعض التجار اللي ضمائرها ماتت في إن هما بيغلوا الأسعار، ماشي الدولار كان غالٍ والمكونات غالية، ولكن لما الدولار ينزل المكونات لازم تنزل".

وأضاف: "هو عايز يعلي هامش ربحه، السلعة كانت بـ2 جنيه وهو بيبعها بـ3 جنيهات، وبيكسب جنيه ولكن المكون دلوقتي بقى بـ جنيه وبردو بيبعها بـ 3 جنيهات؛ عشان يكسب 2 جنيه في السلعة، البورسعيدية عملوا اية بقي؟ وفي أهم سلعة عندهم في بورسعيد، السمك اللي هو من بورسعيد واللي عارف البورسعيدية عارف إن السمك ده وجبه أساسية على المائدة البورسعيدية".

وتابع الإعلامي: "البورسعيدية بياكلو 4-5 أيام في الأسبوع سمك، الناس لقوا إن أسعار السمك غالية وكيلو السمك غالٍ رغم أن الأسعار نزلت، قرر البورسعيدية واتفقوا مع بعض على السوشيال ميديا مش هنشتري سمك وفعلًا حصل المقاطعة، بصوا على منظر حلقة السمك، حلقة السمك في الأيام العادية متعرفش لون الرخام اللي على الأرض من كتر البشر اللي بيبقوا موجودين".

أسعار السمك

وواصل أمين: "النتيجة إن النهاردة بعد يومين بس، بعد 48 ساعة اضطر تجار السمك إنهم ينزلوا السمك بنسبة تصل إلى 40 و50%، أسعار السمك النهاردة نزلت في أنواعه المختلفة من 30 إلى 40 إلى 50% في بعض الأنواع، التجار قالك يا نهار أسود إحنا هنلبس كده وهناكله إحنا".

وأوضح: "دا أول درس البورسعيدية ادهولنا النهاردة إن المقاطعة الشعبية مش كلام فاضي، المقاطعة عايزه رجالة لازم نعمل كده، وآدي أول درس".

واختتم: "تاني درس بقي التسجيل الصوتي لأحد كبار تجار السمك وإحنا بنذيع الصوت ده عشان يديكم دلالة على اللي بيحصل مش بس في السمك، دا واحد من تجار السمك الكبار بيتكلم، الكلام واضح التاجر الكبير بيقوله الأسعار نزلت وأنت لو خدت الكيلو بـ150 جنيهًا بيع زي ما كنت بـ200 جنيه مش تخده بـ150 بيع بـ 160 لآن في واحد تاني عايز يبيع بـ170 و200، وفي الآخر بيهدد التاجر اللي هنعرف إنه خد رخيص وباع رخيص مش هنورد له سمك تاني".