عاجل| الأسعار نزلت 70%.. أحمد موسى يشيد بحملة مقاطعة الأسماك في بورسعيد (فيديو)

أشاد الإعلامي أحمد موسى، بالحملة التي أطلقها أهالي بورسعيد، والتي تستهدف مقاطعة شراء الأسماك؛ نظرًا لارتفاع أسعارها بشكل غير مسبوق، مطالبًا بأن تمتد إلى محافظات أخرى.

مقاطعة الأسماك في بورسعيد

وقال موسى، خلال برنامج "على مسؤوليتي" المذاع على قناة "صدى البلد": "مهم جدًا كل واحد فينا النهاردة لوحدك أنت مش محتاج حد يوجهك، المواطن الإيجابي خليك إيجابي وتضامن مع أهالي بورسعيد، وفي محافظات بتعتمد على السمك زي الإسكندرية والسويس ودمياط معظم اعتمادها الرئيس على الأسماك".

وأضاف: "أهالي بورسعيد عندهم وعي كبير جدًا لما قرروا مع بعض كشفت وكأسر مش هنشتري سمك، توقفنا عن شراء السمك وخلي السمك ده خلاص، النهاردة السمك لو مشتريتوش في يومه متقدرش تخليه هتعمل بيه إيه بكرة ولا بعده".

وتابع موسى: "بعض الناس تقولك اللي مش هيتاخد النهاردة نملحه ونبيعه فسيخ، لا في أنواع لا تصلح فسيخ على الإطلاق، وبالتالي مين اللي خسران النهاردة؟ لازم الوعي ده ينتشر في كل المحافظات ودا بيورينا قد إيه السوق شبه خال، الأسواق شبه خالية إلا من بعض الزوار ناس بتروح تتفسح".

وأوضح الإعلامي: "في بائعين تضامنوا مع الأهالي، وقالوا إحنا مش هنشتري ولا هنبيع خاصة وأن درجة الحرارة مرتفعة، والحملة حققت أهدافها في تراجع لا يقل عن 60-70% في البيع، وبعض الأنواع نزلت 70% من سعرها ومحدش يشتريها".

دعوة لمشاركة المحافظات

وأكمل: "التجار لما رفعوا الأسعار الناس قالتلك الحل بتاعنا إيه نعمل حملة، لازم تجبروا التجار إن الأسعار ترجع لطبيعتها، دي تجربة بورسعيد وهنا الوعي، تخيلوا إحنا مقصرين مع نفسنا في المحافظات، ولو عملنا كده زي بورسعيد السلع كلها هتنزل من غير تدخل حكومي".

وأوضح موسى: "وعي الشعب يمتد إلى الإسماعيلي والسويس والإسكندرية، إحنا متضامنين مع بورسعيد عشان أسعار السمك لازم تنزل للسعر الحقيقي، محدش قالك اخسر، ولكن مينفعش اشتري الحاجة بـ100 وأبيعها بـ 250، الحاجة اللي سعرها 30 مينفعش تتباع بـ100 وهكذا، قيس على ده كافة أسعار الأسماك".

واختتم: "الحملة دي مستمرة لمدة أسبوع كامل، والجميع يتضامن مع هذه الحملة وعاملة رد فعل كبير جدًا، وسمعت في دمياط والإسكندرية".