شاهد.. تامر أمين يعلق على تعادل الزمالك في الكونفدرالية: "حيرتنا معاك"

أكد الإعلامي تامر أمين، أن الزمالك أهدر فوزًا سهلًا على فريق دريمز الغاني في ذهاب نصف نهائي بطولة الكونفدرالية الإفريقية.

 تعادل الزمالك

وقال أمين، خلال برنامج "آخر النهار" المذاع على قناة "النهار": "حيرتنا معاك يا زمالك، بجد حيرتنا معاك يا زمالك، الأسبوع اللي فات تكسب الأهلي لأول مرة من 20 سنة مكسبتوش في الشوط الدور الأول بعد فترة طويلة جدًا من العجز عن هزيمة المنافس التقليدي الأهلي والجماهير الزملكاوية أفراحها واصلة للسما ثم تيجي النهاردة تنكد على جماهيرك في مباراة أقل ما يقال عنها أنها كانت سهلة جدًا جدًا وفي المتناول".

وأضاف: "الزمالك منذ لحظات انتهت مباراته، مباراة الذهاب هنا في القاهرة مع نادي دريمز الغاني، انتهت بالتعادل السلبي صفر صفر، صحيح الزمالك ضيع فرص كتير، وكان في سيل من الهجوم الزملكاوي، وسيل من الفرص والكرة تخبط في العارضة والحارس بيتألق".

وتابع: "ولكن هو أنت إيه يخليك تستنى لآخر عشر دقائق الزمالك بتاع آخر عشر دقائق اللي شوفتهم في الماتش ده لو كان ابتدى المباراة بنفس الهجوم ده كان خلص المباراة تلاتة أربعة، ومكناش استنينا مباراة العودة، ولكن حيرتنا يا زمالك مرة في القمة ومرة تذبذب مستوى فظيع ويخلي حظوظه في استكمال مشوار الكونفيدرالية على كف عفريت".

فرصة الزمالك

وواصل: "صحيح الفريق الغاني ميخوفش وبالمستوى الفني الزمالك يفدر يكسب الفريق ده في غانا، ولكن انتوا عارفين إفريقيا وملاعب إفريقيا وحكام إفريقيا والتصوير التلفزيوني بتاع إفريقيا".

وأوضح: "الفريق الغاني عمل اللي هو عايزه وخرج النهاردة بالنتيجة اللي هو عايزها واللاعبية الغانيين دلوقتي تلاقيهم في أوضة اللبس مقيمين الأفراح والليالي الملاح، وبيرقصوا لأنهم في أقصى أحلامهم مكانوش يتمنوا النتيجة دي، قالك لو كنا اتغلبنا واحد أو اتنين بس هنحاول نعوض، ولكن أن يخرج من معقل الزمالك صفر/ صفر نتيجة مخيبة للآمال الزملكاوية والمصرية وتخلي الموضوع صعب".

واختتم: "الزمالك لو ضيع البطولة دي أنا مش عارف جماهيره ممكن يحصلها ايه، أنا مش زملكاوي ولكن أنا بقولك أهو إن دي فرصة العمر للزمالك إنه يرجع يبقى من كبار وأسياد إفريقيا ويفوز ببطولة من البطولات الكبرى، خصوصًا وأن البطولة سهلة والزمالك حالته كويسة وعنده لاعيبة".