يحيى الفخراني يروي تفاصيل آخر مكالمة مع الراحل صلاح السعدني (فيديو)

كشف الفنان يحيي الفخراني، تفاصيل المكالمة الأخيرة التي جمعته بالفنان الراحل صلاح السعدني والذي وافته المنية يوم أمس يعد صراع مع المرض.

وقال الفخراني خلال مداخلة هاتفية مع برنامج "أنا وهو وهي" المذاع على قناة "صدى البلد": "أخر مكالمة بيننا كانت أيام مهرجان الدراما؛ كنت عامل له تكريم ليه وقالولي مش قادر وكده ولكن قولتلهم أكلمه في التليفون أقوله؛ قلت له مبروك يا صلاح وكده وقالي معلش مش قادر أجي قولتله خلاص أي حد من الأولاد أو انا استلم مكانك واستلمت التكريم مكانه".

وأضاف: "أنا عرفت الله يرحمه صلاح؛ وكان أول عمل مسرحية اسمها حب وفركشة وكانت بطولة صلاح؛ وكان فرقة على المسرح العائم ومن ساعتها مسبناش بعض واغلب الاعمال اللي انا اشتغلتها كان فيها أستاذ صلاح الله يرحمه".

وتابع: "بعد كده اشتغلنا أبنائي الأعزاء شكرا وكان بيقوم بدور الأخ الأوسط اللي هو المثقف وعمل الدور ببراعة والحقيقة كل اعماله؛ كل الاعمال تقريبا حظي كان كويس إن كان فيها الله يرحمه صلاح".

وواصل: "المسرح بالذات غير التلفزيون والسينما؛ المسرح زي البيت بيكشف حقيقة الناس؛ صلاح عمره ما اختلف تقريبا مع حد ولا اسمع أنه اختلف مع حد على الاطلاق وهو كان راجل مثقف جدا".

وأكمل: "مين ميعرفش صلاح السعدني ومين مبيقدروش وهو دا المطلوب مش شهادات ولا تكريمات رأي الجمهور هو المحك الحقيقي والتكريم الحقيقي وأكبر جايزة وبدون ده مفيش؛ الجمهور هو اللي بيقيم الفنان صح وبيديله جوايزه وشهادته؛ أشهر الاعمال كانت ليالي الحلمية لما عمل العمدة سليمان غانم".

وذكر: "صلاح السعدني مكانش المرشح الأول للدور في ليالي الحلمية كان الله يرحمه سعيد صالح ولكن كان عنده مسرح وقال مقدرش اشتغل غير تلات ساعات في اليوم ودا معجبش الإنتاج والإخراج؛ ولعله خير أن صلاح عمل الدور وعمله بشكل جميل الحقيقة وطبعا كواليسه معايا رائعة".

وتوفي الفنان صلاح السعدني عن عمر ناهز 81 عاما، حيث اختار الفنان الراحل اعتزال التمثيل في صمت، قبل 10 أعوام، تزامنًا مع احتفاله بعيد ميلاده السبعين.